Kryeministri Edi Rama duket se nuk do të jetë i pranishëm ditën e sotme në vend, për të ndjekur festimet e 104- vjetorit të Pavarësisë. Çështja e çeljes së negociatave për anëtarësimin në BE e ka shqetësuar më shumë kryeministrin sesa dita e Pavarësisë. Ai ka fluturuar drejt Gjermanisë ku mesditën e sotme do të zhvillojë një takim me kancelaren Merkel. Takimi do të zhvillohet në zyrat e Kancelares Merkel në ora 14:00. Siç është bërë e ditur nga Zyra e Merkelit pas bisedimit kokë më kokë, Merkel dhe Rama do të paraqiten para gazetarëve me një konferencë për median.
Ky takim vjen pak ditë pasi një deputet i partisë së Merkelit, CDU/CSU-së, nga Tirana dha qëndrimin se Bundestagu do t’i rekomandojë qeverisë federale që të mos votojë pro rekomandimit për çeljen e negociatave me BE-në, nëse më parë Shqipëria nuk plotëson 7 kushte.
Megjithatë, siç është shprehur vetë deputeti Gunther Krishbaum, bëhet fjalë për qëndrim personal të tijin, edhe kryeministri Rama në një video-mesazh të kësaj të djele, tha se nuk mund të merret për bazë qëndrimi i një deputeti populist që flet nga ana personale, pa mandat!
Mbetet të shihet me mjaft kureshtje ecuria e këtij takimi nga ku pritet të dalë qëndrimi zyrtar i Gjermanisë përballë rekomandimit të Brukselit për hapjen e negociatave të BE-së me Shqipërinë, me kushtin e vetëm, që të zbatohet reforma në drejtësi. Pritshmëritë e autoriteteve shqiptare, janë që qëndrimi gjerman të jetë shumë më i butë se ai i shprehur nga deputeti Krishbaum.
Discussion about this post