Ashtu siç e kemi thënë dhe më herët kryeministrat e vendeve të Ballkanit Perëndimor janë mbledhur në një takim informal te vilat qeveritare në Durrës.
Në këtë takim informal po marrin pjesë edhe Komisioneri për Politikat Europiane të Fqinjësisë dhe Negociatat e Zgjerimit, Johannes Hahn dhe në fokus të diskutimeve do të jetë rritja e zbatimit të angazhimeve të marra në Samitin e Triestes në korrik 2017.
Në nisje të këtij takimi Rama ka organizuar pritjen për kryeministrat, ku në sy binin mungesat e kryeministrit të Bullgarisë, kryeministrit të Maqedonisë Zaev dhe kryeministres serbe.
Rama i ka tërhequr vëmendjen dhe Ramush Haradinajt, për faktin që kishte vendosur kollare, të cilën më pas kryeministri kosovar është detyruar që ta heqë, për t’iu përmbushur rregullave të kodit të veshjes.
Udhëheqësit e Ballkanit Perëndimor do të diskutojnë mbi integrimin ekonomik të vendeve të rajonit dhe mbi projektin e nisur tashmë për krijimin e një zone ekonomike të rajonit.
Zona Ekonomike Rajonale e vendosur në Samitin e Triestes synon të sigurojë mundësi të reja si për bizneset, ashtu dhe për qytetarët, si dhe do të forcojë zhvillimin dhe vendet e punës.
(E.K/FAXWEB.AL)
Discussion about this post