Në këtë fushatë qytetarët po mbahen larg njohjes së kandidatëve për deputetë e programeve të partive. Kështu po ndodh me dy parti: Partinë Socialiste dhe Partinë Demokratike.
Ju kujtohet spoti elektoral i Edi Ramës duke vënë gjoba?! Tanimë duhet të bëni lidhjen edhe me tërheqjen e Lulzim Bashës në kërkesën për t’u përballur me të. Të dy po punojnë me mish e me shpirt duke ngritur ”Kultin e individit” për veten e tyre, madje as duke u përballur me njëri-tjetrin por duke lënë jashtë edhe kandidatët që do përfaqësojnë zgjedhësit në parlament.
Burime të sigurta pranë PS-së dhe PD-së thonë se të dyja partitë kanë vendosur të shmangin përballjen në debatet televizive edhe me përfaqësues apo kandidatë të partive të tjera.
Këtë vendim e njohin edhe televizionet, duke u përballur papritur me këtë kusht të panegociueshëm për të mos ftuar asnjë përfaqësues të partive të tjera në panelet ku do bëjnë pjesë kandidatë nga PS-ja dhe PD-ja.
Në fillim të fushatës elektorale pas arritjes së marrëveshjes së famshme të 18 majit, Basha vazhdimisht ftonte Ramën në debat publik për t’u përballur me të për programet politike, por pak ditë pas fillimit të fushatës me gaz të plotë, si Rama ashtu edhe Basha kanë shtuar edhe një pikë në marrëveshjen e tyre duke vendosur veton për këto ballafaqime publike, si ndërmjet tyre, ashtu edhe partitë e tjera rivale. (V.G/SHUPLAKA)
