Gjatë vizitës së tij në Kosovë, kryeministri Edi Rama ka gjetur kohën të dalë edhe për kafe me presidentin Hashim Thaçi, ambasadorin e Shqipërisë në Kosovë, Qemal Minxhozi si dhe me ish-presidentin Behgjet Pacolli.
Katërshja e zyrtarëve u takuan fill pas seancës solemne që u mbajt sot për nder të Ditës së Pavarësisë së Kosovës.
Kryeministri shqiptar ka uruar të gjithë qytetarët duke thënë se është një përvjetor me një peshë të jashtëzakonshme pasi ende janë të freskëta kujtimet e së kaluarës. Më pas ai ka përkujtuar edhe kreun e AAK-së Ramush Haradinaj, i cili ende ndodhet në Francë për shkak të urdhërarresteve serbe.
“Së dyti uroj që përsëri edhe sot, kthimin sa më parë në shtëpi të Ramush Haradinajt, sepse pa praninë e tij kjo ditë ka një mungesë dhe mungesa e tij është edhe një ftesë për reflektim për të gjithë që të jenë në funksion jo të Kosovës por të gjithë të tjerëve me luftën e Ushtrisë Çlirimtare të Kosovës”, është shprehur Rama.
