Kryeministri Edi Rama dhe ministri i Brendshëm, Fatmir Xhafaj, shprehën mirënjohje ndaj patrullës së policisë, që pak ditë më parë, ndërhynë duke shmangur një ngjarje të rëndë në familjen e të moshuarve në Fier, që u sulmuan nga grabitës të armatosur.
Rama u shpreh se nëse keqbërësit nuk pranojnë të ulin armët dhe me armë do të kërcënojnë jetën e qytetarëve dhe punonjësve të policisë, kjo është përgjigjia që do të marrin në çdo rast.
“Nëse keqbërësit nuk pranojnë të ulin armët dhe me armë do të kërcënojnë jetën e qytetarëve dhe punonjësve të policisë, kjo është përgjigjia që do të marrin në çdo rast, sikundër ndodhi në Fier. Ka marrë fund njëherë e mirë koha kur bragitësit sulmojnë si në han pa portat bizneset dhe banesat e qytetarëve, pasi do të ketë gjithmonë një reagim të fortë të policisë për t’i arrestuar dhe për t’i çuar prapa hekurave. Sikundër ka marrë fund koha kur punonjësit e policisë braktiseshin në rrugë ndaj krimit, koha kur kriminelët shkonin të bënin homazhe për ushtarakët e vrarë”, tha Rama.
Ndërkohë që ministri i Brendshëm Fatmir Xhafaj ka shprehur mirënjohje për punonjësit e Policisë së Shtetit, që mes plumbava mbrojtën të moshuarit në Fier që tentuan të grabisin një familje.
Edhe pse jeta e këtyre punonjësve të policisë u vu në rrezik real nga sulmi i armatosur, i menjëhershëm dhe i papritur i grupit kriminal, ata nuk hezituan të përmbushnin detyrën që kushtetuta dhe ligji iu ka ngarkuar. Në këtë mënyrë ata justifikuan besimin që qytetarët e Fierit, por edhe të gjithë Shqipërisë kanë sot tek punonjësi i Policisë së Shtetit. Natyrisht askush nuk është i lumtur kur humbet një jetë, qoftë kjo edhe e një personi të përfshirë në krim, por nga ana tjetër ne nuk mundemi të jemi aspak të druajtur që Policia e Shtetit t’i përgjigjet në mënyrën e merituar kujtdo që jo vetëm kryen veprimtari kriminale, por më shumë akoma sulmon me armë punonjësit e Policisë së Shtetit.
Xhafaj ka theksuar edhe rëndësinë e nisjes së zbatimit të reformës në drejtësi.
“Përtej dyshimit të mosbesuesve për fatin e keq të atyre që u përpoqën ta bllokonin, reforma në drejtësi po fillon të funksionojë. Garantojmë se policia do jetë në vijën e parë të frontit si e parashikon ligji dhe së bashku me prokurornë dhe agjencitë e reja ligjzbatuese do godasë me forcën e ligjit paligjshmërinë”.
(M.Q./Faxweb)
