Një deklaratë e paprecedentë u konsiderua ajo e ditës së djeshme që bëri kryeministri Rama nga Kuçova. Për herë të parë në këtë fushatë ai i bëri thirrje punonjësve të Policisë që të dalin në fushatë të mbështesin PS-në.
‘’ U bëj thirrje policisë, në momentin që lënë uniformën, pas pune të përkushtohen për të marrë sa më shumë vota për PS.
Të mos lejojmë rikthimin e hijes së turpit mbi uniformën blu, që ne e kemi pastruar dhe lartësuar dhe bashkë në 4 vite ta bëjmë Policinë e Shtetit të jetë në mesataren e policisë së BE’’, deklaroi Rama.
Mirëpo kjo hasi në reagimin e menjëhershëm të ministrit të brendshëm Demiraj i cili paralajmëroi se çdo polic që bëhet pjesë e fushatës dënohet nga 1 vit deri në 5 vite burg.
Kundra deklaratës së Ramës u rreshtua dhe deputeti i tij Pandeli Majko, i cili u shpreh se nuk i heq asnjë presje asaj që ka thënë Demiraj dhe se kryeministri këtë herë e ka kaluar cakun.
Kundër deklaratës së Ramës nga Kuçova u shpreh dje dhe nënkryetari i LSI-së Luan Rama. Në një deklaratë nga selia e kësaj partie ai u shpreh se Rama po tenton të kërcënojë votuesit.
DEKLARATA E RAMËS:
U bëj thirrje mësuesve të mos lënë minutë ditë e natë pa shfrytëzuar. U bëj thirrje policisë, në momentin që lënë uniformën, pas pune të përkushtohen për të marrë sa më shumë vota për PS. Të mos lejojmë rikthimin e hijes së turpit mbi uniformën blu, që ne e kemi pastruar dhe lartësuar dhe bashkë në 4 vite ta bëjmë Policinë e Shtetit të jetë në mesataren e policisë së BE. I bëj thirrje punonjësve të shtetit të bëjnë të njëjtën gjë, do rrisim rrogat me 40% dhe do bëjmë të mundur që për herë të parë administrata të jetë e shtetit dhe jo e coptuar në zyra të partisë së pushtetit.
REAGIMI I DEMIRAJT:
Kodi Penal i ndryshuar parasheh se shpërdorimi i autoritetit policor për të influencuar një parti politike, për të influencuar pjesëmarrjen në veprimatri politike me kryerjen e çdo veprimi apo propagande përbën vepër penale dhe dënohet nga 1-5 vjet burgim.
Policia e Shtetit është në monitorim të rreptë, të rrespektojnë ligjijn dhe masat do të jenë proporcionale me ligjin. Kam marrë të gjitha masat. Ligji për policinë e shtetit përcakton kufizimet të policisë së shtetit të cilit i ndalohet të jetë anëtar i ndonjë partie apo të mbështesë organizatën e një paritë duke marrë pjesë fizikisht apo financiarisht.
MBËSHTETJA E MAJKOS:
Rama e kaloi cakun. Nuk i heq asnjë presje deklaratës së ministrit. Por deklarata e Ramës kishte një konotacion tjetër, familjare”, tha Majko.
Çfarë doni të them? Kjo është një dramë e madhe që po e krijon regjimi i Edi Ramës në Shqipëri? Merreni me detajet. Shikoni standardin, kur ministri jo i PS del dhe reagon. Politika po bën një fushatë më se të zakonshme.
(E.K/SHUPLAKA)
Discussion about this post