Kryeministri i vendit, Edi Rama nga Shkupi ritheksoi se nuk do të rritet çmimi i energjisë për konsumatorët familjarë dhe për biznesin e vogël, pavarësisht se kjo qasje shtoi Rama do jetë barrë e rëndë për buxhetin e shtetit.
“E kemi vendosur të mos e prekim energjinë për familjarët dhe biznesin e vogël. kjo ka një kosto të lartë për buxhetin e shtetit por nuk do ta prekim. Kemi hyrë në NJë epokë të re të rrezikut dhe ne këtë mund ta përballojmë duke krijuar sa më shumë sinergji dhe duke punuar dhe duke pasur mekanizma bashkëpunues në energji, ushqim, infrastrukturë dhe në të gjitha të tjerat me radhë”, tha Rama.
Gjatë konferencës së përbashkët me kryeministrin e RMV-së, Rama konfirmoi se po punohet për të mbajtur një samit të Ballkanit të Hapur në Tiranë, ndërsa shtoi se ka edhe shtete të tjera, që kanë shprehur interes për t’u bërë pjesë e tij.
“Ne po përgatisim një samit të Ballkanit të Hapur në Shqipëri, dhe jemi të kënaqur që ka edhe vende të tjera, që duan të jenë pjesë e saj. Këtu kam parasysh Greqinë, Turqinë, Italinë”, tha Rama.
Ai e bëri sërish të qartë se nisma e Ballkanit të Hapur nuk është zëvendësim i Procesit të Berlinit, por një procedurë përshpejtuese për të.
“Marrëveshjet e Ballkanit të hapur nuk janë asgjë tjetër, përveçse përshpejtim i Procesit të Berlinit. Në fund fare do mbesim te Ballkani i Hapur, sepse Procesi i Berlinit nuk do jetë përherë”, tha Rama.
(N.M/Faxweb)
Discussion about this post