Kreu i Partisë Demokristiane njëkohësisht ish-deputetit i tërhequr tashmë, Nard Ndoka deklaroi gjatë një interviste për Tëlevizionin Fax News, se ai që ka humbur nga gjithë ajo që po ndodh në politikën shqiptare, është Edi Rama pasi sipas tij po qeveris me një Parlament jo legjitim sepse nuk e ka opozitën përballë.
“Ne kemi përballë një kryeministër aventurier. Ne kemi fituar si opozitë, fundi është i Ramës pasi ai qeveris pa opozitën përballë në një Parlament jo legjitim”, deklaroi Ndoka.
Nard Ndoka i cili është zgjedhur nga listat e Partisë Demokratike gjatë zgjedhjeve të kaluara parlamentare, që prej datës 1 mars nuk është më deputet i Parlamentit Shqiptar, pasi ju bashkua vendimit të opozitës për të djegur mandatin.
Kryetari i PDK-së foli edhe për protestën e sotme të opozitës ku sipas tij, “ishte e madhe, pati një frymë qytetarie dhe i dha një mesazh të madh kryeministrit Rama”.
Ndoka akuzoi kryeministrin si një person të cilit i janë errësuar sytë nga pushteti, është shndërruar në një aventurier dhe përpiqet që të nxjerrë opozitën nga sistemi.
“Kemi një kryeministër aventurier, dhe është i rrezikshëm, që i janë errësuar sytë nga pushteti. Nuk ka dalë opozita nga sistemi por Rama. Rama po përpiqet të bëjë opozitë me deputetë fallco. Nuk kemi akoma një reagim institucional nga ana e mazhorancës për situatën e krijuar në vend. Rama mbolli frikën në politikën shqiptare, mbolli frikën tek qytetarët shqiptarë duke i kërcënuar të gjithë me burg. Këtë gjë e ka bërë edhe me përfaqësues të mazhorancës të cilëve ju ka hequr disa të drejta themelore brenda partisë. Në PS ka persona që mund ti kërkojnë llogari Ramës por ai i kërcënon”, deklaroi ndër të tjera Ndoka.
(F.GJ/FAXWEB.AL)
