Kryeministri Edi Rama, i pranishëm në Korçë për turin e llogaridhënies publike, gjatë fjalës së tij shprehu ngushëllimet për shoferin e ministrit të Brendshëm, Shkëlzen Qordja, që u gjet dje i vdekur në garazhin e Gardës.
“Shpreh ngushëllime për familjen e punonjësit të gardës i cili u nda nga jeta pasi mori një vendim ekstrem dhe befasues për të gjithë ne. Dhe dua të ndaj me familjen të gjithë ndjenjën më të fortë të keqardhjes edhe përtej tragjedisë, edhe dhimbjes së pashpjegueshme për djalin, ata nuk mundën të gjejnë së paku nën rrebeshin e zi të sulmeve politike, për të njëjtat arsye, të mos arsyes që e kanë dominuar për kaq shumë kohë politikën tonë, dhe vazhdojnë që ta dominojnë, pa pasur aspak respekt, as për njerëzit e thjeshtë në kulmin e një momenti dhimbje.
Agresioni brutal ndaj djalit që u nda nga jeta, përfshirja e tij në një skenar fantazie makabër për të goditur qeverinë, ministrin e Brendshëm, vërtetë që nuk ka fjalë për të komentuar. Është i neveritshëm, është i turpshëm, dhe është një tjetër shembull i një vështirësie të jashtëzakonshme në të cilën gjendet debati politik.”
Partia Demokratike gjatë ditës së djeshme akuzoi Gardën e Republikës, Policinë e Shtetit dhe Ministrinë e Brendshme se fshehën ngjarjen e rëndë.
Sipas PD ngjarja e rëndë implikon drejtpërsëdrejti Ministrin e Brendshëm, Fatmir Xhafaj dhe është një vrasje mafioze.
(M.Q/Faxweb)
Discussion about this post