Teksa pasditja e kësaj të premteje dy ditë përpara zgjedhjeve shënon edhe përmbylljen e fushatës elektorale të Partisë Socialiste, e cila ka zgjedhur Vlorën, kryeministri dhe njëherazi kreu i Partisë Socialiste, Edi Rama, u është drejtuar me një video-mesazh shqiptarëve.
Jo për herë të parë gjatë këtyre ditëve fushatë, ai ka zgjedhur që përmes një video t’u kërkojë shqiptarëve që të votojnë PS-në, duke thënë ndër të tjera se votat nuk i do për vete pasi po të ishte për të, i ka provuar të gjitha dhe nuk ka më nevojë e as kuriozitet për pushtet.
Ai shprehet në video-mesazh se ka zbardhur çdo fije floku të mbetur në kokë e ka lagur shumë bluza e këmisha, duke sprovuar gjithashtu e kordat e zërit, e këtë nuk do ta bënte nëse nuk do e ndiente në çdo qelizë se ka ardhur momenti, mundësia më reale për t’ia dalë, ndryshe nga të tjerët.
“Dua që ta dini po ashtu se po të ishte për mua personalisht, do më mjaftonin dhe mbase do më tepronin për çka kam arritur në karrierë në të gjitha këto vite betejë. Nuk kam ndërmend të ngjitem më lart, nuk dua të kem asgjë më tepër për vete nga jeta politike. Nuk kam më as kuriozitetin shumë njerëzor besoj për të provuar ndjesinë e të qenit në postin më të lartë ekzekutiv të Shqipërisë. S’jam më këtu për t’i plotësuar vetes ambicien e ngjitjes në majë, dëshirën e të jetuarit në majë, apo nevojën natyrale të politikanit për pushtet.
Kam bërë plot fushata, kam lagur plot bluza dhe këmisha, kam zbardhur çdo fije floku të mbetur në kokë, kam përshkuar mbi gjysmë milionë kilometra nëpër trupin e këtij vendi… Nëse nuk do ta ndieja në çdo qelizë momentin që ka ardhur, me mundësinë reale për t’ia dalë aty ku të tjerët nuk ia dolën, u dorëzuan, u lëshuan, u dëshpëruan, u larguan, nuk do isha duke lagur bluza dhe këmisha të tjera dhe duke sprovuar kordat e zërit.”, shprehet ndër të tjera Rama teksa ndalet tek vetja.
(XH.A/SHUPLAKA)
Discussion about this post