Kryeministri i vendit, Edi Rama ka deklaruar nga foltorja e Kuvendit, gjatë një seance të jashtëzakonshme për ngritjen e Komisionit Hetimor për shkarkimin e Presidentit, se mazhoranca nuk është mbledhur për të shkakruar një kundërshtar, duke argumentuar se nuk duhet ndaluar kurrë një kundërshtar kur gabon.
Rama theksoi se politikisht, Meta e bën shumë të lehtë pozicionin e mazhorancës në sytë e popullit duke shtuar se, njerëzit e shohin lakuriq të vërtetën e armiqësisë së ilir Metës ndaj saj.
“Kurrë mos e ndalo kundërshtarin kur gabon. Ne nuk jemi mbledhur këtu të ndalojmë një kundërshtar. Si kundërshtar i kësaj shumice qeverisëse Ilir Meta nuk duhet ndaluar. Politikisht ai na i bën shumë më të lehtë pozicionin tonë në sytë e popullit, sepse njerëzia e shohin tanimë krejt lakuriq të vërtetën e armiqësisë së ilir Metës ndaj nesh. Është një armiqësi që synonte të hidhte në herë zgjedhjet që synonte marrjen peng të drejtësisë dhe çeljen e negociatave në BE. E kam thënë se lufta e tyre për të prishur zgjedhjet do rezultonte një vrimë në ujë, por ata do shpallnin fitoren. E Pastaj flasin për pjesëmarrjen, estradë hesapi, 7×7 baras 42”, tha Rama.
Nga ana tjetër, Rama vijoi më tej duke thënë se Presidenti duhet hetuar dhe ndëshkuar nga Parlamenti duke e konsideruar këtë të fundit si armikun e hapur të Kushtetutës.
“Ilir Meta do të ishte politikisht për ne një kundërshtar që duhet ndaluar të gabojë më tutje. Ai është sot një aset i vyer i kësaj shumice qeverisëse. Për ne, dinjiteti i këtij shteti është më i rëndësishëm se sa çdo interes partiak. Ilir Meta duhet hetuar dhe ndëshkuar deri në fund nga ky Kuvend dhe reagimi ynë ndaj tij duhet të jetë frontal përtej dallimeve tona politike dhe në emër të Kushtetutës, demokracisë parlamentare.
Graviteti i Kuvendit është një emërues që duhet të na bashkojë. Ilir Meta nuk është thjesht kundërshtari i qeverisë, ai është sot armiku i hapur i Kushtetutës së Shqipërisë. Ai është sot armiku i deklaruar i Parlamentit të Shqipërisë. Nuk është thjesht politikani i frikësuar deri në palcë i reformës në drejtësi, është sot vetë shëmbëlltyra e kundërshtarëve të reformës në drejtësi.
Shqipëria në NATO, Shqipëria kandidate për BE, me një kryetar shteti që duket si aktor komik, që kur flet seriozisht të bën për të qeshur dhe kur flet për të qeshur të bën për të qarë”, tha Rama.
(F.GJ/FAXWEB.AL)
