Ndryshime në kabinetin e Ramës në Kryeministri. Lëvizjet kanë prekur disa sektorë, ndërsa mësohet edhe emri i drejtorit për Anti-Korrupsionin në Kryeministri.
Ai do të jetë Pirro Vëngu që deri më tani ka mbajtur postin e shefit të kabinetit në Ministrinë për Europën dhe Punët e Jashtme.
Pirro Vëngu është larguar nga Ministria e Jashtme me kërkesë të Ramës, pasi do ta emërojë në detyrën e re. Kabinetit qeveritar ‘Rama 2’ pritet t’i bashkohen edhe emra të rinj këtë mandat.
Duhet thënë se Vëngu është me nënshtetësi greke dhe pak vite më parë është rikthyer nga Franca ku ka kryer studimet për në Shqipëri.
Bushati në një prononcim për mediat pak kohë më parë e quante atë një nga punëtorët më të devotshëm të ministrisë.
Mbi ministrin janë hedhur dhe akuza për përzgjedhjen e Vëngut, pasi mund të cënohej siguria kombëtare. Kjo pasi ai kërkohej nga shteti grek për të kryer shërbimin e detyrueshëm të ushtrisë.
“Mund të them që shefi im i kabinetit është një nga punonjësit më të devotshëm të shtetit shqiptar. CV mund t’ua vendos në dispozicion shqiptarëve. Çdo gjë tjetër është spekulim, pasi idiotët e nevojshëm të fqinëjve vazhdojnë që të gjallojnë”, shprehej Bushati.
“Kjo është një çështje e sqaruar nuk kam pse të prononcohem. Kërkesën e opozitës për dorëheqje e kaloj me një buzëqeshje.
Jam gati në çdo moment që të kërkohem institucionalisht për të dhënë shpjegime për këtë çështje që nuk më përket mua, pasi është në përputhje me legjislacionin dhe ligjin e jashtëm.”, deklaroi me tej Bushati.
(E.K/SHUPLAKA)
