Kreu i Kuvendit Ilir Meta, pas përfundimit të Kryesisë së LSI-së deklaroi se nuk do futej në koalicion me PS-në nëse kryeministri Edi Rama nuk do fronte një “qeveri besimi” për opozitën. Madje ai ofroi për PD-në edhe mandatet e LSI-së në qeveri, kjo në mënyrë që ata të kenë një rol në procesin e zgjedhjeve.
Kryeministri Edi Rama ka reaguar në “Facebook” dy orë pas kësaj deklarate, mirëpo për një çështje krejt tjetër, duke injoruar kushtet që i vuri aleati në qeverisje.
Rama ka publikuar disa fotografi nga vizita e tij zyrtare në Mal të Zi, ku shihet përkrah Kryeministrit Marković por edhe me të tjerë.
“Sot gjatë vizitës zyrtare në Malin e Zi, me Kryeministrin Marković, kryetarin e kuvendit Brajović dhe me komunitetin shqiptar të këtij vendi fqinj të mirë dhe anëtar i 29 i NATOS; për fillimin e një kapitulli të ri marrëdhëniesh në funksion të përmirësimit të jetës ekonomike dhe sociale të qytetarëve në të dy vendet tona.
Projektet e përbashkëta në infrastrukturë, energji, turizëm që po i japin gjithë kësaj hapësire ndërkufitare një vëmendje më të madhe, në funksion të rritjes ekonomike dhe cilësisë së jetës shoqërore do të intensifikohen më tej edhe me takimin e përbashkët të dy qeverive, që do të mbahet në Tetor në Shkodër.”, shkruan Rama. (D.D/Shuplaka)
Discussion about this post