“Gënjej unë, gënjen BE, gënjejnë SHBA, gënjejnë të gjithë veç Lulit e PD që janë i vetmi përkthyes besnik i të vërtetave të këtij vendi”. Kështu shkruante sot në rrjetet sociale kryeministri Edi Rama, duke ironizuar me pretendimet e Partisë Demokratike se ligji i Vettingut, dërguar Komisionit të Venecias, ishte përkthyer gabim nga Euralius.
Por ai që i ka kthyer përgjigje shefit të qeverisë ka qenë deputeti demokrat Gerti Bogdani.
“Ti gënjen e ç’të gënjyer! Gënjeshtrat e tua kushtojnë qindra miliona euro çdo vit duke mashtruar dhe vjedhur popullin tend. Të paktën Merkelin nuk e kishe gënjyer dot siç nuk gënjen dot më asnjë udhëheqes europian apo amerikan. Tani ka ardhur koha të merresh me kohë të plotë me ekspozitat dhe të provosh a hap dot ndonjë pa qenë kryeminister!“, shkruan Bogdani në Facebook.
Komisioni i Venecias zbardhi mesditën e sotme opinionin final për ligjin e Vettingut, duke konfirmuar kushtetutshmërinë e tij.
