Burime nga prokuroria bëjnë të ditur se kryeministri Edi Rama i ka kërkuar Prokurores së Përgjithshme të Përkohshme, Arta Markut që në shkelje të ligjit, hetimi i protestës së PD t’i kalojë Krimeve të Rënda.
Të njëjtat burime shpjegojnë se Marku deri tani nuk e ka pranuar si të mundur këtë gjë, pasi ajo tejkalon çdo kompetencë ligjore dhe është shkelje flagrante e ligjit.
Ndoshta për këtë arsye, kryeprokurorja vazhdon të jetë në zyrën e kryeministrit në këto momente. Makina e saj, të cilën nuk e përdor çdo ditë, është futur në kryeministri në orën 9-të të mëngjesit.
Një ditë pas protestës së opozitës, Prokurorja e Përgjithshme e Përkohshme Arta Marku ka mbërritur në zyrën e Kryeministrit Edi Rama.
Ndërkohë, nuk dihen detaje të tjera apo qëllimi konkret i vizitës kaq të papritur të Markut, por mendohet se takimi mund të ketë lidhje me protestën e djeshme.
Kujtojmë se në protestën e djeshme mbi 100 persona janë shoqëruar në komisariatet e policisë në Tiranë, ndërsa një pjesë e tyre janë liruar mëngjesin e sotëm. Një ndër ta ka qenë edhe Sekretari Organizativ i Partisë Demokratike Sahit Dollapi i cili pas dhunës nga policia ditën e djeshme, u mbajt mbi një orë në gjendje të rëndë në rajonin e policisë, për tu shoqëruar më pas në spital.
Ndërkohë ka nisur protesta e organizuar nga dega e Partisë Demokratike në Tiranë përpara Drejtorisë së Policisë e cila zhvillohet si shenjë revolte ndaj sjelljes së policisë në protestën e djeshme si dhe në kuadër të aksionit opozitar për vijimin e saj në mënyrë të pandërprerë.
Në këtë protestë marrin pjesë edhe drejtuesit më të lartë të opozitës, ish-deputetë por ende nuk ka mbërritur kreu democrat Lulzim Basha dhe kryetarja e LSI-së Monika Kryemadhi të cilët nuk dihen në do të marrin pjesë pasi ajo është pa një axhendë të caktuar.
(F.GJ/FAXWEB.AL)
Discussion about this post