Si zakonisht edhe dje kryeministri Rama mbajti para ndjekësve të tij në rrjetet sociale komunikimin e tij javor. Ajo që la një habi të madhe ishte fakti që kryeministri i vendit nuk tha asnjë fjalë me skandalin e rradhës që prek ish-ministrin e tij Saimir Tahiri.
Aq shumë poetik është kryeministri në fjalët e tij, sa në një moment të ”vjen keq” që ai krejt rastësisht ndodhet në këtë situatë dhe është pre e baltosjeve. Sipas asaj që ai vetë seklaroi dje ai ka zgjedhur të luftojë me krimin.
“Kollaj ta këndosh këngën e krimit në mexhelisin e katundit politik dhe mediatik dhe të derdhësh llumë përditë në çdo kanal komunikimi me njerëzit për të synuar pushtetin me akuza e shpifje monstruoze apo për të përfituar favore prej tij me shantazhe e gjoba mediatike.
Por më e vështirë të provohesh i denjë në luftën me krimin duke e përballuar sfidën dhe baltën. Unë kam zgjedhur të dytën dhe baltosja e punës dhe emrit, është kostoja e kësaj zgjedhjeje për të cilën, u jam mirënjohës njerëzve të zakonshëm të këtij vendi që nuk më kanë lënë dhe nuk më lënë të pendohem për asnjë sekondë, paçka se balta e hedhur mbi mua, ka qenë dhe vazhdon të jetë dozë elefanti” u shpreh Rama./E.K
