Kryeministri Edi Rama ka reaguar në lidhje me ndarjen nga jeta të ish-diplomatit të njohur amerikan Henry Kissinger. Ai u nda nga jeta ditën e sotme në moshën 100-vjeçare.
Rama shprehet se librat e Kissingerit i mbeten njerëzimit si pasuri e paçmueshme e një eksperience dhe urtësie të rrallë e cila do të jetë në dispozicion të kujtdo, që do të aftësohet mbi marrëdhëniet ndërkombëtare dhe gjeopolitikën.
Kryeministri gjithashtu kujton një moment të veçantë kur u takua me Kissinger, që për Ramën ka qenë një ndër bisedat më të bukura që mban mend.
Postimi i kryeminstrit Rama:
LAMTUMIRË BOS
Librat Tuaj i mbeten njerëzimit si pasuria e paçmueshme e një eksperience dhe urtësie të rrallë, e do të jenë në dispozicion të kujtdo sot e gjithmonë, që do të dojë të aftësohet mbi marrëdhëniet ndërkombëtare dhe gjeopolitikën; balancat mes fuqive dhe realizmin politik në ruajtjen e paqes e në projektimin e rrugëdaljeve nga konfliktet ndërshtetërore; të menduarit strategjik dhe perspektivën afatgjatë të politikës së jashtme; rolin e shkencës joekzakte të historisë dhe rëndësinë e talentit të individit kur duhen marrë vendime përballë mjegullës së të nesërmes… Mua personalisht do të më mbetet edhe mirënjohja për kohën e çmuar që më kushtuat bujarisht, duke më dhuruar një ndër bisedat më të bukura që mbaj mend.
U prehshi në paqe Dr.Kissinger
