Kryeministri Edi Rama inspektoi sot disa prej kantiereve që po ndërtohen në Tiranë si në infrastrukturë dhe në disa institucione kulturore të kryeqytetit. Në një postim në rrjetet sociale, Rama ndau sot fotoalbumin e inspektimeve të kryera gjatë ditës së sotme.
“Fotoalbumi i një dite në kantieret e Tiranës, ku puna në çdo drejtim për Shqipërinë 2030 nuk ndalon asnjë ditë”, shkruan Rama. Ditën e sotme kryeministri Edi Rama inspektoi sot rrugën Ndroq-Plepa, projekt i cili është në fazën e parë të rehabilitimit dhe konsiderohet si një vepër e rëndësishme jo vetëm nga ana infrastrukturore, por edhe për zhvillimin ekonomik, bujqësor dhe agroturistik që po merr zona.
Pjesë e investimit është dhe rindërtimi i Urës së Beshirit, e cila do të eliminojë të gjitha kthesat duke rritur sigurinë rrugore. Kreu i qeverisë inspektoi gjithashtu aksin Tiranë – Durrës, ku kërkoi po ashtu edhe hartimin e një masterplani për të shmangur problemet e krijuara nga trafiku i brendshëm.
Gjatë ditës së sotme kryeministri Rama inspektoi Qendrën e re Kombëtare të Kulturës për Fëmijë, e cila do të ngrihet pranë Parkut të Madh të Liqenit në Tiranë. Rama tha se “kjo do të jetë një qendër europiane, që do të ofrojë mundësi bashkëpunimi me institucione ndërkombëtare. Ballkani nuk ka një projekt si ky, dhe duhet të fillojmë menjëherë kontakte me qendrat ndërkombëtare, si ato suedeze dhe spanjolle, për të krijuar një program të pasur ndërkombëtar”.
Kryeministri Rama inspektoi edhe ambientet e Mozaikut të Tiranës për të parë nga afër formën përfundimtare të këtij projekti. Rama u informua mbi rëndësinë e përfundimit të kësaj strukture moderne, e cila kërkoi gati dy vite punë për t’u realizuar.
