Kryeministri Edi Rama ka firmosur shkarkimin e kreut të Bashkisë së Vaut të Dejës, Zef Hila, pas kërkesës së bërë nga ministri i brendshëm Sandër Lleshaj. Sipas Ramës të njëjtin fat do të kenë dhe të gjithë kryebashkiakët që do të tentojnë të bllokojnë zgjedhjet.
“Zef Hila, haxhiqamilisti i Vaut të Dejës, jo vetëm u shkarkua po do të ndiqet penalisht, për aktin barbar të djegies së shkollës dhe djegies së materialeve zgjedhore! Kush do ta ndjekë shembullin e tij, do të ketë të njëjtin fat dhe do të përballet me drejtësinë”, shkruan Rama në Twitter bashkëngjitur me vendimin.
Rama e ka firmosur vendimin e tij nga Vlora, ku ndodhet për mbylljen e fushatës elektorale të PS-së.
Në një lidhje telefonike me Fax News, kryebashkiaku Hila u shpreh se ai as nuk kishte qenë pjesë e protestës, dhe ministri Sandër Lleshaj ka qenë i painformuar.
“Unë nuk kam qenë as në protest, dhe as pranë vendit ku u zhvillu tubimi. Unë nuk jam në dijeni të nismës së ministrit për shkarkim, po ministri nuk është në dijeni nëse kam qenë apo jo unë. Kjo ka qenë një nismë e degës së PD-së, nuk ka pasur lidhje kreu i Bashkisë, ministrin e kanë disinformuar. Vëllai im ka qenë në protestë si mbështetës i PD, nuk jam në dijeni të arrestimit të tij”, u shpreh Hila për Fax News.
(E.K/Faxweb.al)
