Kryeministri Rama zhvilloi një takim me të gjithë kryebashkiakët e vendit, porn ë këtë takim u vu re mungesa e kryetarit të bashkisë së Kamzës, Xhelal Mziu.
Kryebashkiaku njofton përmes faqes zyrtare të bashkisë, se si kishte munguar në këtë takim, për shkak se Rama nuk e kishte ftuar atë.
“Vijon diskriminimi nga ana e Kryeministrit hakmarrës për kryebashkiakun, Bashkinë dhe qytetarët e Kamzës. Kryetarët e bashkive të vendit u thirrën sot në një takim në Kryeministri nga kreu i qeverisë, por Edi Rama nuk thirri kryetarin e Bashkisë Kamëz, z. Xhelal Mziu.”, shkruhet në njoftim.
Bashkia e Kamzës e cilëson Ramën si një kryeministër hakmarrës, i cili me këtë veprim ka fyer jo vetëm Mziun, port ë gjithë qytetarët e Bashkisë.
“Ky Kryeministër hakmarrës vijon të diskriminojë jo vetëm Bashkinë, kryebashkiakun e saj, por edhe qytetarët e Kamzës, duke harruar që Kamza është Bashkia e gjashtë në shkallë vendi.
‘Programi i Rilindjes Urbane është një urë shumë e rëndësishme e bashkëpunimit ndërmjet qeverisë dhe bashkive’, – është shprehur Kryeministri sot, por këtë frymë bashkëpunimi nuk e ka shtrirë te bashkitë e djathta, veçanërisht te Bashkia e Kamzës, të cilën për katër vjet rresht e ka diskriminuar, jo vetëm si institucion, por edhe qytetarët e saj.
Më absurde dhe më e dhimbshme bëhet kjo, kur mendon se në këtë qytet nuk jetojnë vetëm demokratë, por edhe qytetarë të bindjeve të majta apo bindjeve të tjera, të cilët e vuajnë diskriminimin e këtij Kryeministri hakmarrës.
Ritheksojmë edhe një herë në 4 vjet kjo qeveri nuk ka akorduar asnjë fond apo financim për rreth 130 projekte të paraqitura qeverisë. Ndoshta mosthirrja e kryebashkiakut Xhelal Mziu në këtë takim vjen për këtë shkak, pasi asnjë qindarkë nuk i është dhënë njësisë vendore që drejton z. Mziu për tri mandate rresht.
Vijon kështu ende që të mos ketë frymë bashkëpunimi nga ana e qeverisë, pavarësisht nga nevojat që kanë banorët e Kamzës dhe të Paskuqanit për investime publike në fusha jetike për ta.”, thuhet në njoftimin e bashkisë. (D.D/Shuplaka)
