Sekretari për Çështjet Ligjore në Partinë Demokratike, Çlirim Gjata deklaroi në studion e lajmeve të Fax News se është e pakuptimtë dhe e patolerushme që bëhet propagandë për heqjen e vizave ndaj atyre që marrin pjesë në protestat e opozitës dhe pengojnë sipas tij, procesin e paligjshëm zgjedhor të 30 Qershorit.
Sipas Gjatës, nuk është kryeministri Edi Rama ai që vendos për të hequr apo për të vënë regjimin ndaj qytetarëve dhe politikanëve për të lëvizur në vendet e BE-së apo në SHBA.
Ai argumentoi se qeveria e drejtuar nga Rama, nuk ka bërë asnjë hap për integrimin e vendit që nga largimi i PD-së nga pushteti dhe shtoi se, tërheqja nga aksioni opozitar do të ishte një humbje e madhe për Shqipërinë.
Gjata foli edhe për regjistrimin e subjekteve partiake dhe kandidatëve për bashkitë për zgjedhjet e Qershorit duke thënë se janë bërë manipulime përmes mbledhjes së firmave fallco.
Duke folur për vendimin e opozitës për të bërë regjistrimin e komisionerëve të KZAZ-ve në KQZ, Gjata tha se kjo është një lëvizje të cilën e parashikon Kodi Zgjedhor, duke argumentuar se kjo është një e drejtë legjitime e opozitës.
“Kam qenë vetë kryetar i KQZ dhe e di se çfarë vështirësish ka për këtë i kam dalë gjithnjë në mbrojtje por është e papranueshme kur ky institucion ndjek linjën e qevrisë. Prandaj duhet ta ndërpresi trajtimin politik të kësaj gjëje. Nuk ka zgjedhje me 30 Qershor, ne kemi thënë se opozita nuk do të lejojë zhvillimin e zgjedhjeve dhe Rama nuk e çon deri në këtë situatë, mund të kujtojmë rastin e Kavajës dhe u tërhoq jo më në gjithë Shqipërinë sepse nuk mund të kthehet sërish anti-pluralizmi në vend. Nuk mund të arrestojë 30 mijë qytetarë”, tha ndër të tjera Gjata në Fax News.
Lidhur me regjistrimin e Bindjes Demokratike në zgjedhje, Gjata tha se është bërë manipulim duke falsifikuar firmat dhe marrë vendime në gjykatë brenda ditës.
“Bindja Demokratike nuk po na bën asgjë, por me shpejtësinë që erdhi ajo, u bë e mundur nga Rama, gjykata e regjistroi brenda ditës. KQZ thotë se na e ka sjellë gjykata, por si e ka sjellë brenda ditës, këtë po e bën kryeministri i cili po mundohet të sajojë opozitën. Nuk krijohet opozita kështu pasi ajo është frymë.
Ai thërret prokuroren në orën 9-të të mëngjesit në zyrën e tij, po kush e bën këtë!(?) Në këtë situatë askush nuk i del kundër, vetëm opozita që është në rrugë mund ta pengojë. Gjatë ngutjes ai ka bërë edhe budallallëqe duke falsifikuar edhe firmat e deputetëve por ajo që ai po përpiqet të krijojë nuk është opozitë por shërbyese e Ramës dhe i bën fasadë qeverisjes së tij”.
(F.GJ/FAXWEB.AL)
Discussion about this post