Kreu i PD-së Lulzim Basha ka qenë sot në fshatin Rrëzë të Krujës, që sipas tij është lënë në harresë nga ana e qeverisë, pavarësisht se pothuajse të gjitha banesat janë shkatërruar nga tërmeti i 26 Nëntorit.
Kryedemokrati këmbëngul se qeveria duhet të kalojë menjëherë 150 milionë dollarët që janë parashikuar tiu jepen oligarkëve, për këtë fatkeqësi natyrore.
Por kjo thirrje e vazhdueshme e Bashës ka rënë në vesh të shurdhët, pasi Rama e tha qartë në mbledhjen e sotme të qeverisë, se asnjë nga koncesionet dhe PPP-të nuk do të preken.
Postimi i Bashës:
Dhjetëra familje me fëmijë të vegjël në Rrëzë të Krujës, kanë mbetur krejt të vetëm në përballimin e pasojave që u la tërmeti i javës së kaluar.
Për fat të mirë në këtë fshat nuk pati asnjë viktimë, por pothuajse të gjitha shtëpitë janë të pabanueshme. Asnjë masë nuk është marrë për ta. Asnjë ndihmë, asnjë çadër apo ushqim, nuk u ka ardhur nga shteti.
Duhet hapa konkretë dhe zgjidhje emergjente sepse gjendja e tyre po rëndohet edhe nga moti i ftohtë.
Pa humbur kohë 150 milion dollarët që janë ndarë për 10 oligarkë duhet të kalojnë për banorët e dëmtuar nga tërmeti që sot janë në qiell të hapur.
Qeveria duhet të nisë lëvrimin e fondeve për tu ardhur në ndihmë banorëve në zonat rurale për të cilët është e pamundur zhvendosja, në mënyrë që të nisin riparimin apo rindërtimin e shtëpive të shkatërruara.
