Për kryeministrin Rama, në Shqipëri po merr jetë një qasje e re ndaj BE-së dhe për këtë fajëson Partinë Demokratike dhe protestën e saj në çadër që sipas tij është kundër zbatimit të reformës në drejtësi dhe vettingut.
Sipas Ramës, pa reformë në drejtësi nuk ka integrim në BE dhe se opozita nuk e do datën 18 qershor për të zhvilluar zgjedhjet sepse ka frikë nga reforma.
“Sot po merr jetë një qasje e re ndaj Bashkimit Evropian. Është një qasje që merr formë përditë si pasojë e frikës së jashtëzakonshme ndaj reformës në drejtësi pa të cilën BE-ja është e pamundur të pranojë.
Frika nga drejtësia po jep jetë qasje destruktive të PD-së. Frika nga drejtësia e ka kthyer ditën e 18 qershorit, një ditë që politikanët e korruptuar në çadër nuk e duan kurrë.
Janë gati të bashkohen me kundërshtarët e BE-së nga perëndimi në lindje, sepse e duan Shqipërinë një çiflig pa ndëshkueshmërie“,- u shpreh Rama në komunikimin javor.
“Ata që nuk e duan 18 qershorin dhe që zgjedhjet i kanë vetëm këngë në gojë. Ata që duan të shpëtojnë veten nga drejtësia dhe gjykimi i drejtë për krime të së kaluarës. Ne e dimë që Shqipëria që duam nuk është një slogan por një obligim qytetar.
Shqipëria që duam është shumë më e mirë se Shqipëria që kemi dhe e dimë që duhet të bëjmë shumë më shumë akoma. Kjo është një betejë që Shqipëria nuk mund ta humbasë përsëri siç ka bërë më parë. Është një ndarje e errësirës së politikës së vjetër. 18 qershori do sjellë një vendim të qartë: O me Europën, o me frikën nga Europën, o me rritjen ekonomike, o me zhytjen në batak, o me një qeveri që lufton çdo ditë, ose me një qeveri që na kthen në të shkuarën”,- shtoi Rama.
(M.D/ Shuplaka)
