Kryeministri Edi Rama, i cili ishte i pranishëm në inspektimin e punimeve tek kryqëzimi i Rrugës së Kavajës me Unazën e Re, shprehu nevojën e ndërhyrjes patjetër tek mbikalimi i “Zogut të Zi”. Ai theksoi se duhet ndërhyrë patjetër për të shmangur koston e madhe për qytetarët.
Më tej, ai shtoi se kjo ndërhyrje bashkë me të tjera, si ajo tek “Shqiponja”, projekti “Bulevardi i Ri” apo ai i Sheshit “Skënderbej”, do i japin një pamje të re qytetit duke vendosur në një bazë tjetër platformën e zhvillimit të infrastrukturës së Tiranës.
“Fatkeqësisht, ajo që ndodhi me “Zogun e Zi” disa vite më parë, sot faktikisht është kthyer në një kosto shumë të madhe për qytetarët, sepse në atë nyje duhet ndërhyrë patjetër, siç duhet tentuar një rimodifikim në nyjën tjetër te “Shqiponja”. Janë vepra që, nëse do i kishim bërë me radhë e në kohën e duhur, e nuk do na kishin dalë pengesat komplet barbare që na dolën, sot do ishim në kushte të tjera. Por rëndësi ka të përfundojë kjo pjesë dhe pastaj me siguri do gjejmë një zgjidhje dhe për “Zogun e Zi”, edhe për “Shqiponjën”, ka thënë ndër të tjera Rama.
Discussion about this post