Në rubrikën “Amarcord” në Facebook kryeministri Edi Rama ka publikuar foton e parlamentit të parë shqiptar.
Duke marrë shkas se kjo përkon edhe me ditëlindjen e ish kreut të Kuvendit vite më parë, Pjeter Arbnorit, Rama ka postuar një foto të deputetëve që kanë qenë pjesë e parlamentit të viti 1921.
Postimi i plotë i Ramës:
Çelja e sesionit të fundit të kësaj legjislature në një javë që përkon për më tepër me ditëlindjen e të ndjerit Pjetër Arbnori, mishërimit emblematik të parlamentarizmit post-totalitar, na kthen te fotoja e papërsëritshme e Parlamentit të parë demokratik shqiptar, atë të dalë nga votat e 1921.
Deputetët e legjislaturës së parë vinin nga tallazet e viteve të fundit të sundimit osman dhe vitet e para të Pavarësisë. Shohim mes tyre një mbret të ardhshëm, dy nga poetët dhe tre nga klerikët më të mëdhenj shqiptarë, pronarë të mëdhenj tokash dhe arhondë, intelektualë dhe vegjëli, mes tyre edhe cuba të njohur të feudeve të kohës. Të gjithë, në meandrat e një jete që nuk do t’u kursejë as mërgimin, as uljengritjet e pushtetit dhe madje as vëllavrasjet politike, do të shënjojnë jetën kombëtare të paktën deri më 1945.
Mund të thuhet se kjo legjislaturë ka qenë një nga më përfaqësueset në historinë e vendit. Të gjithë të barabartë, ulur mbi karrige të përmbysura, ata dolën nga një përballje politike jo pak traumatizuese, por sidoqoftë nga e para votë popullore”.
Parlamenti i parë shqiptar, 1921, emrat sipas rreshtave:
1 – Llambi Goxhomani, Bahri Omari, Ali Koprenca, Milto Tutulani.
2 – Luigj Gurakuqi, Atë Gjergj Fishta, Shefqet Vërlaci, Osman Haxhia, Ahmet Zogolli, Eshref Frashëri…
3 – Shefqet Daiu, Ali Këlcyra, Kolë Thaçi, Halit Rroji, Banush Hamdi Bega, Qemal Vrioni, Ahmet Hastopalli, Dom Ndre Mjeda, Maliq Bushati, Pandeli Cale, Anton Beça.
4 – Spiro Koleka, Shuk Gurakuqi, Masar Këlliçi, Rexhep Mitrovica, Spiro Papa, Agatokli Xhitoni, Leonidha Frashëri, Syrja Pojani, Stavri Vinjau, Patuk Saraçi, Taqi Buda, Ibrahim Xhindi…
5 – Leonidha Koja, Koço Tasi, Mustafa Kruja, Qazim Kokoshi, Loni Kristo, Bajram Fejziu, Mustafa Maksuti, Qemal Mullaj, Sejfi Vllamasi, Bektash Cakrani.
