Rama publikon letrën e Trump, gazetari më ironik se kurrë: Pikëpyetje e madhe për gjithë njerëzimin!

Gazetari i njohur Bledian Koka ironizon kryeministrin Edi Rama që gjatë ditës së sotme publikoi mesazhin falenderues të presidentit amerikan Donald Trump, si përgjigje ndaj urimit të tij për inaugurimin.

Koka përmend kritikat që kryeministri shqiptar ka bërë ndaj Trump-it, përpara se ky të fitonte zgjedhjet presidenciale.

“Edi Rama i pergjigjet Trump…
I dashur Trumpo, e lexova letren tuaj dhe gjeja e pare qe me erdhi ne mendje ishte lutja ime ne CNN ne interviste me Richard Quest “God forbid” qe ti te mos beheshe President i Amerikes. Por ja qe zoti ua mori mend amerikaneve edhe pse disa here une deklarova gjate fushates tende lart e poshte se “s’kam dëgjuar as më absurdin ndër amerikanët që është Donald Trump të sulmojë policinë e shtetit edhe vetë ai që s’ka lënë absurditete pa nxjerrë nga goja s’e sulmon Policinë e Shtetit”. Ca te thote vllai jot, ti e di qe une mendoj realisht ate qe kam thene tek Baton Haxhiu se “Donald Trump eshte nje kercenim per SHBA-ne dhe natyrisht eshte nje kercenim per marredheniet shqiptaro-amerikane”. Dhe e perseris pa ndroje ate qe kam thene tek Muc Nano se “kandidatura e Trump eshte nje turp i madh per gjithe Ameriken dhe nje pikepyetje e madhe per te gjithe njerezimin”…
p.s…letren tuaj po e perkthej personalisht, i juaji Edi”, shkruan Koka në profilin e tij në Facebook.

Kujtojmë që gjatë ditës së sotme, Rama publikoi në profilin e tij në Facebook, letrën e mesazhit të falenderimit që Trump i kishte dërguar. Sigurisht e përkthyer në shqip.

POSTIMI I RAMËS:

Faleminderit edhe Presidentit Trump për mesazhin e tij ku shkruhet:

“I dashur Kryeministër,

Unë e mirëpres ngrohtësisht mesazhin tuaj të urimit për betimin tim si President i Shteteve të Bashkuara dhe e vlerësoj lart mendimin, mbështetjen e inkurajimin tuaj.

Ne kemi përpara sfida të cilat jam i bindur se do t’i kapërcejmë, mbi themelet e përbashkëta dhe në partneritet me njëri-tjetrin. Ne po ashtu kemi mundësira të jashtëzakonshme për përparimin e qëllimeve që ndajmë, për promovimin e stabilitetit global e për arritjen e paqes e të prosperitetit.

Sinqerisht i Juaji,

Donald J.Trump” (D.D/Shuplaka)