Rama i quajti të leshtë, Meta krejtësisht qasje tjetër me ambasadorët. Çfarë i tha në sy Qemal Minxhozit

Askush nuk e ka humbur lehtë nga kujtesa sjelljen e Edi Ramës me ambasadorët e Shqipërisë, para zgjedhjeve.

Në momentet kur përflitej ndryshimi i ministrit Ditmir Bushati, shefi i tij i ”futi në vrimë të gjilpërës” gjithë përfaqësuesit e shtetit shqiptar nëpër botë.

Por sot një qasje krejt tjetër është parë nga presidenti i republikës Ilir Meta.

Ai jo vetëm u shfaqi hapur dëshirën për t’i dëgjuar, por nuk munguan prej tij edhe vlerësimet.

Një prej tyre ishte për ambasadorin tonë në Kosovë, Qemal Minxhozin.

”Qemali mundohet të bëjë ndonjë gjë të vogël me dashuri të madhe, promovon Theth-Valbonës, i merr ambasadorët, promovon pataten e Kukësit…”, tha mes të tjerash Meta, duke dëgjuar më pas ambasadorët që nisën të flasin lirshëm.

”E kam pyetur veten dhe pyes edhe ju sot, shumë hapur: Po si ka mundësi që keni qenë kaq  të avashtë, ose për ta thënë shqip, kaq të leshtë, për të ndjerë urgjencën e domosdoshmërisë, për të gjetur mekanizmat e duhur, për të ndërtuar platformat, për të hartuar formulat, skicuar rrugët e nevojshme, në mënyrë që realiteti ynë, ky vend që ndryshon me muaj dhe me javë, të pasqyrohet me zhdërvjelltësinë e  duhur, angazhimin e vazhdueshëm, aftësinë dhe shprehitë e nevojshme, jashtë kufijve tanë, ku na njohin pak, s’na njohin fare ose më keq akoma, na njohin keq.”, shpërtheu muaj më para para ambasadorëve kryeministri Edi Rama, duke mos marrë në kthim asnjë kritikë nga ambasadorët e pranishëm për gjuhën e përdorur.

(V.G/Faxweb)

Qemal Minxhozi dhe Ilir Meta