Kryeministri Edi Rama ka reaguar për herë të parë për provokimin e Serbisë ndaj Kosovës. Në fakt, kryeministri nuk e ka prekur këtë temë as në komunikimin javor por ka zgjedhur t’i përgjigjet një komentuesi i cili e ka porositur Ramën të ketë kujdes.
Kryeministri e quan marrëzi dërgimin e trenit dje nga pala serbe për në Kosovë dhe thekson se Serbia do ta vuajë makthin deri kur ta njohë Kosovën dhe vetëm atëherë do shpëtojë nga ky makth.
Sipas tij “lojërat me trena e aeroplanë” janë manovra politike për hesape politike.
“O Enver po ku do futet Serbia o Enver?! Ka mbaruar ajo pune, Kosova është shtet o mik, nuk është krahine e Jugosllavise e me Serbinë e lidh vetëm ndërtimi i te ardhmes se fqinjësisë mes dy shteteve, jo e shkuara rrënuese e serbomadhnise! Serbia do ta vuaje atë te shkuar si makth deri kur ta njohe Kosovën dhe vetëm duke e njohur do te shpëtojë nga ai makth (qe e shtyn hera – herës ne marrëzira si kjo puna e trenit); ndersa serbet e Beogradit ne Kosove veç si turiste do te vijnë një dite po si zot te vendit s’vijne dot me kurrën e kurrës. Këto lojërat me trena e me aeroplanë janë manovra politike, për hesape politike, po hesapi i lirisë e pavarësisë se Kosovës është kry Enver”, i është përgjigjur Rama komentit të një qytetari.
Më herët, Gazeta Express publikoi një shkrim ku e sulmonte Ramën për mosreagim lidhur me incidentin me trenin. (A.R/SHUPLAKA)
