Rama: Shkollat në Kamzë, të njëjtat kushte si shkollat e reja në çdo kryeqytet të Evropës

Kryeministri Edi Rama dhe Ministrja e Arsimit dhe Sportit, Ogerta Manastirliu ishin sot në shkollën “Halit Coka”, në Kamzë për të vijuar takimet këshilluese me prindërit dhe mësuesit për kufizimin e rrjeteve si TikTok. Në fjalën e tij, Rama u shpreh se, “pjesëmarrja në këto bashkëbisedime me përfaqësitë e prindërve në radhë të parë, na ka dhënë dhe mua personalisht më ka dhënë shumë arsye për të qenë shumë optimist për situatën dhe për fuqinë që së bashku mund të vëmë në dispozicion të përmirësimit të mëtejshëm të situatës”.

“Them optimist për situatën sepse është fare e qartë që ka një dallim të jashtëzakonshëm midis të gjitha atyre prodhimeve të politikës dhe të medias lidhur me gjithë sa ndodhi që u bë shkak për këtë proces dhe perceptimit dhe shqetësimit të komunitetit të prindërve, që është një perceptim shumë më tepër i bazuar në realitetin e përditshëm të shkollës dhe që është një shqetësim shumë më tepër i lidhur me çfarë realisht duhet përmirësuar”, theksoi Rama.

“Në radhë të parë këtu në Kamzë besoj është vendi më i duhur për të ballafaquar të gjithë së bashku realitetin e zhvillimit të infrastrukturës shkollore dhe të përmirësimit të kushteve të shkollës”, u shpreh Rama.

Rama solli një nga dëshmitë e prindërve që i ka bërë përshtypje kur tha që, “çfarë ndodh sot në aspektin e gjërave që nuk duhet të ndodhin është 2% e atyre që ndodhnin deri dje, por që nuk merrnin kaq shumë vëmendje dhe nuk bënin kaq shumë zhurmë për faktin se në një farë mënyre njerëzit ishin mësuar me një situatë që dukej e pashpresë”.

Faktikisht, theksoi Rama, “këtu kur ne kemi filluar, edhe dua ta nënvizoj në radhë të parë falë vullnetit dhe këmbënguljes së kryetarit të bashkisë, i cili do të ishte mirë të ishte këtu sot, sepse është i veçantë në këtë aspekt, që lidhet me transformimin e gjithë situatës në sistemin dhe infrastrukturën e sistemit para universitar në Kamzë, pasqyra ka qenë dramatike. Domethënë, pasiguria ishte e shtrirë deri në pusetat e hapura në rrugën gjithë baltë të shkollës”. “Sot situata është katërcipërisht e ndryshuar edhe shkollat në Kamzë, por jo vetëm shkollat, por edhe kopshtet, janë absolutisht të të njëjtave standarde dhe kanë të njëjtat kushte si shkollat e reja, jo si të gjitha shkollat, por si shkollat e reja në çdo kryeqytet të Evropës dhe këtë e them me bindje të plotë”, tha Rama. /j.p/