Kryeministri Edi Rama ka shpërndarë sot në Kukës një pjesë të lejeve të legalizimit për banorët përfitues. Përpara shpërndarjes së tyre, ai u shpreh se në krahasim me PD-në që kishte interest ë legalizonte bizneset, kjo qeveri synon legalizimin e banesave.
Por në ndryshim nga herët e tjera, shpërndarja e legalizimeve në këtë qytet është shoqëruar përtej batutave të kryeministrit me ankesat e qytetarëve, e të tjerë që kanë zgjedhur të mos flasin e të falënderojnë publikisht, por të largohen thjesht duke tërhequr lejet e tyre.
Dy prej banorëve iu ankuan kreut të Qeverisë për shkarkimin nga puna dhe mosdhënien e pensionit.
“Më larguan nga puna në 2013-ën. Duam që ky ankth të na hiqet. Pavarësisht interesimit, nuk po na jepet zgjidhje.”, iu ankua qytetarja. “E kuptova, respekte. Kemi disa probleme me disa bashki që nuk e respektojnë portalin online për mësuesit. Kjo është një arsye që ne ta kthejmë në ligj. Është e padrejtë që ato që janë klasifikuar fituese në këtë portal të mos punojnë, apo t’u merret merita.”, është shprehur Rama i zënë ngushtë nga ankesa e qytetares.
Një tjetër qytetar shprehu ankesën për heqjen e pensionit pasi tërhoqi lejen e legalizimit për banesën e të vëllait, të cilit Rama i premtoi se do ta zgjidhte si çështje”.
Nuk munguan batutat e kryeministrit teksa shpërndante legalizimet për banorët kuksianë. “Hajde ti hajde. Edhe një papafingo…”, duke iu referuar banorit qeros. “Seç po na fryn një erë e madhe. Po na marrin nëpër gojë më duket… Jo këtu jo, nga televizori”; “Lëre partinë ore, mos falënderoi partinë se ka edhe demokratë këtu”, ishin disa prej batutave të tij.
(XH.A/SHUPLAKA)
Discussion about this post