Dje ishte pritja e fundvitit me ambasadorët, ndërsa ditën e sotme kryeministri Rama ia ka kushtuar mësuesve. Rama i ka mbledhur mësuesit në një darkë festive në Pallatin e Kongreseve, të cilën e nisi me një batutë për burrat.
“Kur filluan të flasin disa në tavolina vetëm burrat flisnin ndërkohë që gratë mbanin fjalim. Burrat përmirësohen, por nuk bëhen. Prandaj të rrojnë gratë sa malet dhe pastaj nën hijen e maleve të rrojnë dhe burrat”, tha kryeministri.
Ndër të tjera Rama shtoi se duke filluar nga 1 Marsi, mësuesit do të përfitojnë një rritje rroge me 10 %.
“Tre vjet më parë ju paguheshit më pak dhe taksoheshit më shumë. Ne hoqëm taksën 10% që bënte që ju paguanit më shumë se ministrja e Arsimit dhe rritëm fuqinë tuaj blerëse. Për shkak të reformave dhe për shkak të daljes nga borxhi që trashëguam dhe vendosjes së shtetit nga pikëpamja financiare në binare, jemi të gatshëm të rrisim rrogat tuaj. Dhe ju jeni në dijeni se nga 1 marsi rroga do të rritet me 10%. Është e konsiderueshme, por jo e mjaftueshme. Mbetet sfidë që ne ta rrisim edhe më shumë. Dhe këtë sfidë ne do ta fitojmë”, tha kryeministri ynë.
Ministrja e Arsimit Lindita Nikolla, e cila gjithashtu ishte e pranishme në takim, tha se rezultatet e arritura nga 15-vjeçarët janë fryt i punës së madhe të mësuesve të tyre.
“Rezultatet e 15-vjeçarëve janë fryt i djersës energjisë dhe pasionit tuaj. Në emër të gjithë shkollës shqiptare, ministrisë lejomëni tju uroj. Janë rezultatet tuaja. Ka vend për mirënohje por nuk ka vend për eufori. Më shumë punë dhe përkushtim për të vijuar punën tonë të reformave. Duke ju uruar një vit të mbarë më lejoni t’ju them që 2017 do jetë viti i mësuesit. Ju drejtohem me një ftesë, të vijojmë në rrugën tonë të refornmave, jo vetëm duke punuar në orë mësimi por duke e komunikuar atë me prindërit dhe mësuesit”, tha ministrja Nikolla.
Më pas ajo i falenderoi mësuesit për punën e bërë dhe për rezultatet që kanë arritur në këtë vite. Sipas Nikollës, 2017-a do të jetë viti i mësuesit.
Discussion about this post