Sekretari i Përgjithshëm i Partisë Demokratike, Gazment Bardhi, ka dalë një konferencë për mediet, ku ka folur rreth protestës së paralajmëruar për tu mbajtur më 16 shkurt.
Sipas Bardhit, “Përdorimi i policisë për protestën e 16 shkurtit është politike”, ndërsa paralajmëroi: “Policia të qëndrojë larg protestuesve në të kundërt do të mbajë përgjegjësi”.
Ai e ka akuzuar kryeministrin Edi Rama se skenari për të përdorur policinë si vegël politike është kriminal, ndërsa i bëri thirrje atij të heqë dorë nga ky skenar destabilizuet, pasi nuk mund ta ndalojë dot qytetarin e pakënaqur.
Po ashtu zyrtari i lartë u shpreh se Partia Demokratike garanton çdo shqiptar për sigurinë në protestë.
“Shqiptarët do t’i bashkohen protestës së 16 shkurtit pasi e dinë mirë se kriminelët dhe bandat janë me Edi Ramën në qeveri dhe jo mes protestuesve. Ne do të protestojmë si njerëz të lirë dhe me dinjitet. Paralajmërojmë policinë e Shtetit të Edi Ramës të rrijë larg protestuesve, të mos pengojë lëvizjen e lirë të tyre përndryshe secili prej shërbëtorëve të skenarit kriminal të Edi Ramës do të mbajë përgjegjësi personale dhe ligjore. Në Shqipëri ka vetëm një skenar destabilizimi, ai është skenari i Edi Ramës për të qeverisur bashkë me krimin e organizuar”, deklaroi Bardhi.
(B.B/ Faxweb.al)
