Kryeministri Edi Rama, gjatë takimit elektoral të zhvilluar në Librazhd, kërkoi sërish votën e qytetarëve pasi sipas tij ka ardhur koha që të merret një vendim historik.
Sipas Ramës, është koha që pushteti të mos u lihet partive që marrin peng qeverisjen dhe kërkojnë pjesë në tepsinë e pushtet.
Më tej, ai u ndal tek qeverisje aktuale, duke premtuar se nëse PS-së i jepet timoni, do të bëjë 4-fishin e asaj që ka bërë në 44 muaj.
“Është koha për të marrë një vendim historik që pushteti i dalë nga zgjedhjet i takon popullit dhe jo partive që marrin peng qeverisjen për llogari të pjesës së tyre në tepsinë e pushtetit.
Është koha për t’i dhënë PS-së një mandat të plotë për ta rritur ekonominë si asnjëherë më parë dhe për të na dhënë mundësinë që të luftojmë me të njëjtin pasion që luftuam për reformën në drejtësi dhe vettingun për ta çuar ekonominë në rritje mbi 5%.
Votoni, jo për t’i gjetur Lulit një punë që Luli nuk e bën dot. Jam shumë i bindur se qytetarët do të votojnë jo për të kapur administratën, por për t’i thënë partive që duan të na mbajnë peng se nuk do të votojmë juve. Nëse do na jepni fuqinë e plotë, 4-fishin e atyre që kemi bërë në 44 muaj.
Na duhet vendosmëri dhe kokëfortësi e madhe për t’i zmbrapsur njëherë e mirë hordhitë e gjykatësve të korruptuar, e partive, hijet e së kaluarës. Për të hapur më shumë më tepër forca rrugët e mëtejshme për Shqipërinë që duam, me shtet, me punë dhe mirëqënie.
Vota e 25 qershorit duhet të mbështesë punën, jo llafet, zhvillimin, jo pengmarrjen, drejtësinë, jo zullumin, meritën, jo rryshfetin. Ngrijeni lart flamurin kuq e zi. Çdo premtim është një fuqi më shumë. Partia Socialiste është partia e të gjithë shqiptarëve.”, u shpreh Rama.
Discussion about this post