Qindra banorë janë prekur nga tërmetet e harëpashershme që kanë rënë përpara disa ditësh në Korçë ku shumë prej banesave të tyre janë shembur duke u bërë të pajetueshme, e për pasojë ata prej ditësh janë detyruar të strehohen nëpër çadrat e ushtrisë të shpërndara nga Shtabi i Emergjencave.
Në mbledhjen e sotme të Këshillit Bashkiak Tiranë, është marrë vendimi që Bashkia e kryeqytetit të ofrojë mbështetje në kuadër të ndihmave që do të jepen ndaj banorëve të prekur nga tërmetet në Korçë.
Kështu, Bashkia e Tiranës në kuadër të këtyre ndihmave do të ofrojë një fond prej 10 milionë lekë të reja në zonën e Floqit, si një nga fshatrat me dëmet më të mëdha që janë shkaktuar nga tërmetet ditët e fundit.
Ky vendim vjen pas kërkesës së kryeministrit Edi Rama i cili ka kërrkuar nga krerët e bashkive në vend, që të akordojnë ndihma apo fonde për dëmshpërblimin e banorëve si dhe për rindërtimin e banesave të tyre.
Pas tërmeteve të njëpasnjëshme në juglindje të vendit kryebashkiaku i Korçës Sotiraq Filo ka bërë një përllogaritje paraprake të dëmit të shkaktuar në shtëpitë e dëmtuara.
Sipas Filos komisioni i studimit në terren ka verifikuar dëmet dhe paraprakisht mendohet se mund të shkojë deri në 250 milionë lekë të reja.
Këtu përfshihet rindërtimi i banesave dhe rikonstruksioni i tyre. Ndërkaq po punohet për studimin e vendit ku do të ndërtohen banesat pasi aktualist zona e Floqit është një zonë sizmike (lexo këtu).
Sipas Prefektit të Korçës, Dhori Spirollari në total janë 125 banesa të pabanueshme.
Ndërkohë kujtojmë se banorët e fshatit Floq prej gati 2 javësh janë të strehuar në çadrat e ushtrisë, ku sipas tyre janë në kushte aspak të mira.
(F.GJ/FAXWEB.AL)
