Ylber Ramadani ka folur në një konferencë për shtyp rreth takimit të nesërm që do të luajnë ndaj Kukësit në “Elbasan Arena”.
Mesfushori i të kuqve theksoi që do të japin maksimumin për ta fituar këtë sfidë dhe u bëri thirrje tifozëve për mbështetje.
“E dimë mjaft mirë rëndësinë e përballjes me Kukësin. Prej 2 ditësh po përgatitemi maksimalisht dhe të gjithë jemi të vetëdijshëm që na pret një tjetër 90 minutësh i zjarrtë, ku padyshim do të kërkojmë fitoren për tiu afruar edhe më shumë kreut. Është e vërtetë që Kukësi është skuadra e vetme që na ka mundur në këtë sezon , por nga ana tjetër nuk ka arritur të na mposhtë asnjëherë në përballjet në shtëpi, besoj se edhe këtë herë do të arrijmë të ruajmë këtë statistikë pozitive që kemi me ta. Këtë javë sërisht përballemi me një tjetër pretendent kryesor për titullin, detyra jonë është të vijojmë të luftojmë në çdo ndeshje për fitore, pasi titulli siç edhe e kemi deklaruar mbetet objektivi ynë në këtë sezon dhe besoj që ky është viti ynë. E vlerësojmë Kukësin për rezultatet e arritura deri tani dhe mendoj se ka në dispozicion një grup me mjaft kualitete, por ne besojmë në forcat tona dhe sigurisht do të arrijmë të dalim me sukses nga kjo përballje. I ftoj tifozët tanë të mrekullueshëm të jenë të shumtë në “Elbasan Arena” pasi janë një forcë e madhe për ne dhe së bashku të ecim drejt rrugës së Titullit”.
Discussion about this post