Opozita ka vendosur të mos marrë pjesë sot në seancën parlamentare, ndërsa maxhorancës i duhen 84 vota për të kaluar ligjin për reformën në drejtësi.
Nisma në fjalë është një ndryshim në ligjin “Për statusin e gjyqtarëve dhe prokurorëve në Republikën e Shqipërisë”, që i lejon Shkollës së Magjistraturës së pranojë studentë për vitin e ri akademik 2018- 2019, edhe pse ata nuk i janë nënshtruar më parë procesit të vetingut.
Fjalen e mori kreu i Grupit Parlamentar të LSI-së Petrit Vasili i cili tha se është e papranueshme që të vazhdohet të flietet në këtë Parlament ndërsa janë vjedhur votat në votimin për teatrin.
Ai ka thënë se kërkesa e opozitës për anulimin e atij votimi është depozituar dhe duhej shqyrtuar.
“Ka qenë gjithë koha në dispozicion për të bërë investigimin. Është standart shumë i ulët ku vota u tjetërsua në mënyrë të turpshme. Për ne është e papranueshme që të vazhdojmë këtu”, tha Vasili.
Ndërkohë i të njëjtit mendim ishte edhe Edmond Spaho, i cili deklaroi se për shkak të mos marrjes në konsideratë të kërkesës së opozitës nuk mund të merrnin pjesë në seancë.
“Ditën e enjte votim i paprecedentë, rezultat i manipuluar, një deputet që nuk ishte në sallë rezulton të ketë votuar pro ligjit pët teatrin.
Kërkesa jonë për të rivotuar ligjin është bërë para dy ditësh. Kjo është një gjë shumë e rëndësishme.
Për shkak të kësaj ne kemi vendosur të mos marrim pjesë në këtë seancë”, tha Spaho.
Nga ana tjetër Ruçi u përgjigij se pamjet filmike do të shqyrtohen dhe ai do të marrë një vendim më pas. (B.H/Faxweb)
Discussion about this post