Rreth 6 vite para vdekjes së tij, ish-presidenti Ramiz Alia, ka rrëfyer zhvillimin që ndoqi vdekjen e Mehmet Shehut dhe mendimin e tij për të pas vite pas vdekjes së tij.
Në një intervistë të botuar në gazetën “Abc” në 2005-ën, të risjellë së fundmi nga “Konica.al”, ish-presidenti komunist cilësohet se ka dhënë intervistën më të plotë e më të çlirët të tij. I pyetur për raportin e tij me Mehmet Shehun, Ramiz Alia thekson se nuk kanë qenë të ftohta, por korrekte, duke hedhur poshtë mundësinë se konsiderohej riva kryesor për postin pas Enver Hoxhës.
“Mehmeti konsiderohej si njeriu që do të vinte pas Enver Hoxhës. Sa ishte gjallë Hysni Kapo, kishte një lloj dyshimi se cili do të ishte pasuesi i Enverit, por absolutisht për mua që isha në radhën e tretë apo të katërt. Pasi vdiq Hysniu, ishte Mehmeti ai që konsiderohej si pasardhës. Madje edhe ne, sekretarët e Komitetit Qendror, kur nuk ishte Enveri, shkonim te Mehmeti për t’u këshilluar. Prandaj, nuk ka qenë ky motiv.”
I pyetur për qëndrimin pas vdekjes së tij, Ramiz Alia ka rrëfyer gjatë intervistës se pyetja që i mundonte të gjithë ishte se përse Mehmet Shehu vrau veten, duke mos e vënë në dyshim mundësinë se mund të ishte vrarë.
“Vetëvrasja e Mehmetit e komplikoi problemin, pasi lindi pyetja se përse e bëri këtë? Pse vrau veten? Ishte pikërisht kjo pse. Mua, kur më njoftuan për vrasjen e Mehmetit, kam shkuar te Enveri për t’a lajmëruar. Gjëja e parë që tha Enveri: “Po pse vrau veten?”. I bëri pyetje vetes. Nuk deshi përgjigje nga unë. Pra, lindi kjo pyetje. E më vonë, pas një apo dy ditësh, në zyrën e Enverit, ai më bëri një pyetje: “I ke parë ti ato dokumenta që na kanë ardhur në vitin 1964 për Mehmetin”?
Unë nuk kisha parë gjë dhe i thashë: “Jo, nuk di gjë”. U ngrit, ishin në kasafortën e Hysnin Kapos që kishte vdekur në atë kohë. Kasafortën e Hysniut e mbante Enveri në kasafortën e tij. E hapi atë kasafortë dhe më dha një zarf me kartela, të cilat ishin kartela të zbulimit të huaj. Autentike apo jo, unë nuk them dot gjë. Fakt është që ato i kishin parë në vitin 1964 Enveri dhe Hysniu, vetëm këta të dy, e kishin arritur në përfundimin se ky është një provokacion që na bëjnë rusët për të na ndarë me Mehmetin.”, ka rrëfyer Alia.
Megjithatë, në 2005-ën, vite pas vetëvrasjes së Shehut, ish-presidenti ka rrëfyer se me zemër nuk besonte në implikimin e Mehmet Shehut si agjent i jugosllavëve, i amerikanëve apo rusëve:
“Po të kishte qenë Mehmeti i tillë që nga viti 1942-’43, kohë kur ishte në kampin e përqendrimit, deri në vitin 1981 kur vrau veten, i thonë 40 vjet. Çfarë ka pritur? Ishte në krye të vendit. Po të ishte agjent i amerikanëve apo i anglezëve, çfarë donin më tepër ata për ta shtruar Shqipërinë?! Mehmeti do të kishte vepruar. Por deri atëherë s’ka vepruar. Domethënë, kur them vepruar, një agjent i atij niveli bën përmbysje. Nuk thotë ai: …Ky është kështu, e ky është ashtu… Muhabet kot. Pra, ai një veprim të tillë nuk e bëri. E ka pasur raste të shumta, si për shembull në kohën e prishjes me sovjetikët. Nga kjo pikëpamje, janë të dyshimta konkluzionet mbi atë çështje.”
(XH.A/SHUPLAKA)
