Ish-kryeministri i Kosovës, Ramush Haradinaj, ka reaguar së fundmi mbi procesin gjyqësor që pritet të zhvillohet ditën e nesërme ndaj tij në Colmar të Francës. Në një bisedë telefonike për gazetën “Express” lideri i AAK-së është shprehur mundet që as nesër të mos merret ndonjë vendim.
Haradinaj është shprehur se gjykata mund të mos marrë vendim për lirimin e tij, megjithatë ai porosit mbështetësit që të qëndrojnë të qetë pasi e drejta është në anë të tij.
“Në seancën e nesërme janë mocionet nëse mund t’i quaj kështu përfundimtare, prokuroria edhe njëherë paraqet argumentet e veta pse janë plotësuar kushtet për ekstradim në Serbi, ndërsa mbrojtja në këtë rast ne, do të dorëzojmë mocionin tonë pse kjo kërkesë për ekstradim është e pabazë dhe është politike. Nuk ka bazë ligjore se është përsëritje e akuzave që kanë ekzistuar para Tribunalit të Hagës. Pra nesër kemi ballafaqimin. Ekziston mundësia teorike për vendim edhe nesër, por pritet që vendimi të merret në ditët në vijim, pra jo nesër.
Ne jemi në të drejtën tonë, kemi qenë gjithnjë. E drejta jonë është e drejtë e ligjit, e drejtë e njeriut dhe e popullit të Zotit. Nuk kemi pse të shqetësohemi, kjo procedurë do të kryhet gjithsesi. Vërtet është marrë shumë kohë, vërtetë është bërë e tepërt dhe është abuzuar me situatën rreth nesh, mirëpo një gjë është e qartë se kjo vetëm se sa do të na bëjë më besnikë ndaj të drejtës tonë shqiptare në Ballkan. Serbët duhet ta kuptojnë forcën e të drejtës së shqiptarëve, pra shqiptarët janë në tokën e vetë, në të drejtën e vet.”, mësohet të ketë thënë ai.
Ramush Haradinaj u ndalua më 4 janar nga autoritetet franceze, në bazë të një urdhër-arresti serb të lëshuar 13 vjet më parë.
(XH.A/SHUPLAKA)
