Sezoni i hapjes së sistemit ngrohës së kaldajave ende nuk ka filluar plotësisht në Shkup, por tashmë kryeqyteti maqedonas është në mesin e dhjetë qyteteve me ajrin më të ndotur në botë për momentin.
Në listën alarmante të vendeve me ajrin më ndotës, para dy ditësh ishte edhe Kumanova, ku sipas matjeve shkencore grimcat ndotëse në ajër ishin 35 herë më shumë se mbi normën e lejuar, me mbi 1800 mikrogramë për metër kub.
Autoritetet lokale në Kumanovë thonë se arsyeja e ndotjes së madhe atje është spitali i qytetit që përdor lëndën e mazutit për ngrohjen qëndrore. Komuna njoftoi se menjëherë kanë filluar me aerosolizimin si masë urgjente për të zvogëluar ndotjen ndërsa ka kërkuar nga pushteti qendror të ndajë fonde për gazifikimin e plotë të spitalit.
Nga Ministria e Mjedisit të Maqedonisë së Veriut ndërkohë raportohet se janë ndërmarrë masa, ndërsa më shumë informacione priten të bëhen me dije të hënën.
Zyrtarë nga ministria e mjedisit megjithatë kanë deklaruar se për të zgjidhur problemin e ndotjes duhet kohë dhe masa afatgjate.
‘Ka plan, për këtë s’ka dyshim, të gjithë duhet të jemi të vetëdijshëm për faktin se ky problem nuk mund të zgjidhet përnjëherë, por se me strategji afatgjatë. Të gjithë bashkë duhet të punojmë për ta zvogëluar ndotjen e ajrit, e dimë që do të na duhet kohë sepse shumë faktorë kontribuojnë për këtë, ngrohja e amvisërive, efikasiteti energjetik, makinat në transport, industria kontribuon në këtë drejtim dhe duhet të ndërmarrim masa. Do të vazhdojmë të punojmë për të arritur rezultate’, ka thënë Naser Nuredini, Ministri i Ambientit.
Problemi me ajrin e ndotur intensifikohet çdoherë gjatë periudhës së dimrit. Vitin e kaluar, qeveria maqedonase miratoi disa masa parandaluese, duke ndërmarrë edhe nismën që transporti publik të ishte falas. U shtrenjtua gjitashtu dyfish çmimi i parkingjeve, u ndaluan të gjitha punimet në kantierët e ndërtimeve si dhe u kufizua përdorimi i automjeteve zyrtare të institucioneve të shtetit./Alsat
