Tjetër rast dhune u raportua sot në media ndaj dy vogëlushëve në një kopësht privat në rrugën “Nikolla Lena” të kryeqytetit. Edukatorja Denida Rexhepi 30 vjeçe u vu në pranga pas denoncimit të nënave të dy fëmijëve.
Ndërkohë që ky rast është ende në hetim e sipër dhe detaje të reja pritet të zbardhen hap pas hapi, kujtojmë dy rastet e ngjashme të dhunës ndaj fëmijëve në Shqipëri, ai i administratores së kopshtit “Diren”, Anjeza Shabanit në Qershor të 2016-ës dhe ai i eduaktores, kujdestares Edvana Sulaj në jetimoren e Shkodrës.
Bëri bujë në media video ku Anjeza Shabani shihej duke rrahur barbarisht vogëlushin 3-vjeçar. Me zë dhe figurë të transmetuar në emisionin “Stop”, u panë nga të gjithë momentet e tmerrit për fëmijën që qante teksa dhunohej nga administratorja, e cila para trupit gjykues shprehej se e kishte rrahur vetëm një herë. Rasti nisi të hetohej pas denoncimit të babait të 3-vjeçarit që tregoi se si i biri qante në shtëpi dhe godiste kokën me grushtë.
Në rastin e dytë, pas zbulimit të skandalit në jetimoren e Shkodrës, kujdestarja u vu në pranga për keqtrajtim të miturish. Në videon që gjithashtu u transmetua në media, ajo shihej duke dhunuar të miturit pa ndjerë mëshirë për lotët e tyre. Në video shihej se si ajo i ulej në prehër njërit prej tyre dhe kërcente, pavarësisht se vogëlushi qante nga dhimbja.
(XH.A/SHUPLAKA)
