Kryeredaktori i gazetës “Rilindja Demokratike”, Bledi Kasmi në një intervistë në Televizionin ‘Fax News’ u shpreh se, arrestimi i kryetarit të Bashkisë Lezhë, Fran Frrokaj është bërë me urdhër të Ramës për t’i hapur rrugë Pjerin Ndreut të kapë Bashkinë e Lezhës.
“Hapi i parë ka qenë ngritja e një hetimi, hapi i dytë arrestimi i Fran Frrokajt dhe hapi i tretë përgatitja e Pjerin Ndreut për kapjen e Bashkisë së Lezhës”, tha Kasmi.
Në lidhje me debatin mbi një shkrim në gazetën RD mbi një darkë mes Ramës dhe Frrokajt disa javë më parë, Kasmi sqaroi se shkrimi hedh dritë disa rrethana në komunikimin që Frrokaj ka patur me bashkëpunëtorë të tij.
Ata e kishin paralajmëruar Frrokajn që atëhere se pas darkave të tilla, Rama përgatit skenarë hakmarrjeje politike, duke e paralajmëruar që atëhere për pasojat që mund të kishte në të ardhmen. Termi “Darka e gabuar” është përmendur në atë kohë nga vetë Frrokaj, i cili shpresonte se qeveria do të ndihmonte Lezhën me projekte zhvillimi.
“Shkrimi ka pasur dy komponentë, e para ka qenë një kujtes për një darkë që ka ndodhur disa javë më parë ku ka qenë i pranishëmn edhe kryeministri edhe kryetari i Bashkisë Lezhë dhe të japë detaje në lidhje me reagimet disa prej personazheve të asaj darke, si dhe titulli që duhet të jëtë sa më intrigues për lexuesin. Titulli “darka e gabuar”, ose citati nuk i referohet gazetës, e ka përmendur vetë Fran Frrokaj në atë darkë tek mbështetësit e tij. Nuk ka patur të bëjë me një distancim, ne kemi reaguar të parët, pra nuk bëhet fjalë për distancim, por për sqarim të një momenti se çfarë ka ndodhur”, tha ai.
Kasmi u shpreh se nuk mund të flitet për besueshmëri të Prokurorisë në një kohë që arrestimin e Frrokajt e ka paralajmëruar Fatmir Xhafa duke folur në emër të Prokurorisë. “Në momentin kur Xhafa flet në emër të Prokurorisë, atëhere kë duhet të besojmë se është në krye të Prokurorisë, Fatmir Xhafën apo Arta Markun. Në rastin kur në emër të Prokurorisë dhe hetimeve deklaratat i bën Fatmir Xhafa, atëhere kush është Kryeprokuror Arta Marku apo Fatmir Xhafa?”, tha ai.
(B.H/Faxweb)
