Ministria e Jashtme e Kosovës ka reaguar pas deklaratës së Serbisë për njohjen e vendit nga Kenia, duke e cilësuar një akt armiqësor ndaj Beogradit, teksa paralajmëroi edhe marrjen e masave diplomatike. Në një deklaratë, Prishtina zyrtare thekson se Serbia tregoi edhe njëherë se nuk ka interes për të normalizuar marrëdhëniet.
Sipas ministrisë së Jashtme, Serbia po shpërfill hapur zotimet e saj ndaj BE, duke refuzuar njohjen e Kosovës dhe duke shtrembëruar parimet juridike ndërkombëtare.
Më tej, Kosova i kujton Serbisë luftërat në Ballkan dhe gjenocidin ndërsa thotë se nuk ka autoritet e moral për t’u diktuar vendeve të drejtën ndërkombëtare.
“Serbia refuzon të hapë arkivat e saj shtetërore, duke e penguar botën të njohë të vërtetën e plotë për mizoritë sistematike të kryera nga policia, ushtria dhe forcat e saj paramilitare në Kosovë, masakra brutale si ato në Reçak, Izbicë, Krushë të Madhe, Poklek, Podujevë e Mejë, të cilat i kujtojmë çdo vit. Shumë nga udhëheqësit politikë dhe ushtarakë të Serbisë janë gjykuar dhe dënuar nga Tribunali i Hagës për rolin e tyre në vrasjet sistematike dhe dëbimet masive të shqiptarëve të Kosovës. Kjo Serbi nuk ka asnjë autoritet moral për t’i dhënë leksione asnjë vendi mbi të drejtën ndërkombëtare e aq më pak Kenias, vendi që ka njohur Kosovën në mënyrë të drejtë dhe të ligjshme.”
Sipas ministrisë së jashtme të Kosovës, deklarata e Serbisë është e mbushur me gënjeshtra të hapura dhe dezinformata të qëllimshme. Prishtina thotë se në fakt është Serbia ajo që refuzon të përmbyllë dialogun dhe të normalizojnë marrëdhëniet, duke shtuar se po gënjen jo vetëm BE-në por edhe popullin e saj.
