Reagojnë familjarët e efektivit Azbi Spahiu:Nuk i është bërë presion as nga eprorët dhe as nga biznesmenë

Familjarët e policit të qarkullimit rrugor, Azbi Spahiu, i cili më 15 janar u hodh nga lartësia e një pallati në kryeqytet, kanë reaguar për herë të parë, ku përpos gjendjes shëndetësore të efektivit kanë vendosur pikat mbi “i” duke hedhur poshtë aludimet që prej ditësh janë duke qarkulluar nëpër rrjet, e jo vetëm.

Përmes një reagimi, familjarët e efektivit 57-vjeçar fillimisht kanë bërë me dije se fatmirësisht gjendja shëndetësore e tij është drejt përmirësimit dhe kjo falë ndihmës dhe përkushtimit të palodhur të mjekëve të Spitalit Ushtarak.

Më tej ata theksojnë se kjo ngjarje ka ardhur si pasojë e një situatë personale, dhe nuk ka lidhje aspak me presione për shkak të detyrës nga eprorë, kolegë, qytetarë apo biznesmenë, ashtu si dhe është aluduar ditëve të fundit.

Reagimi i plotë i familjarëve:

Në përgjigje të interesimit të mediave, ne, familja Spahiu, ndjejmë detyrimin të sqarojmë  situatën e të afërmit tonë, Azbiut.

Ne dëshirojmë të shprehim falënderimet tona të sinqerta për të gjithë ata që, në këto ditë të vështira, na kanë qëndruar pranë. Në radhë të parë, falënderojmë miqtë, të afërmit, kolegët e punës dhe çdo person tjetër që ka treguar solidaritet, qoftë edhe pa pasur njohje të mëparshme me ne.

Fatmirësisht, gjendja shëndetësore e të dashurit tonë po përmirësohet dhe mezi presim që ai të rikthehet sa më parë në jetën dhe punën e përditshme.

Ne si familje kemi qenë gjithnjë të thjeshtë dhe larg qendrës së vëmendjes së medias apo opinionit publik. Situata aktuale ka krijuar shqetësim, jo vetëm për Azbiun, por edhe për ne si familje, miqtë dhe të afërmit tanë. Kjo vëmendje e tepërt dhe aludimet e pavërteta nuk ndihmojnë, përkundrazi, na e rëndojnë situatën. Për këtë arsye, ju lutemi të gjithëve që ta respektojnë privatësinë tonë dhe të mos merren me spekulime me çështjet personale, që as i di njeri e as ka pse t’i dijë.

Siç na kanë këshilluar edhe mjekët, ajo që i duhet më shumë tani Azbiut është qetësia. E vlerësojmë shumë interesimin dhe mbështetjen e gjithkujt, por kërkojmë mirëkuptim që asnjë veprim të mos ndërmerret në emrin tonë, sepse nuk na ndihmon.

Për të gjithë ata që janë shqetësuar për shëndetin dhe sigurinë e Azbiut, dëshirojmë të konfirmojmë se kjo është një situatë personale dhe nuk lidhet aspak me ndonjë presion për shkak të detyrës nga eprorë, kolegë, qytetarë apo biznesmenë, siç është aluduar në disa raste.

E falënderojmë secilin prej jush që ka treguar mbështetje të sinqertë. Jemi mirënjohës për punën e palodhur të mjekëve të Spitalit të Traumës, të cilët po ndihmojnë në rikuperimin e shpejtë të Azbiut. Me ndihmën e tyre dhe mbështetjen e gjithë miqve tanë, jemi të bindur që gjithçka do të kthehet në normalitet. Ju falënderojmë nga zemra për mirëkuptimin dhe mbështetjen tuaj.