Drejtoria e përgjithshme e Burgjeve ka reaguar për “Shuplaka” lidhur me lajmin për një plan ekzekutimi të Jaho Mulosmanit, i akuzuar për vrasjen e Azem Hajdarit.
Në reagimin e saj, Drejtoria e Burgjeve shprehet se nuk ka asnjë informacion lidhur me ngjarjen, ndërkohë që burime të sigurta thanë paraprakisht për “Shuplaka” se autoritetet e burgut të sigurisë së lartë në Burrel kanë marrë masa për mbrojtjen e Mulosmanit, i cili po vuan dënimin me burgim të përjetshëm.
Reagimi i Drejtorisë së Përgjithshme të Burgjeve
“Zyrtarisht pranë Drejtorisë së Përgjithshme nuk ka mbërritur asnjë informacion i tillë, as nga drejtoria e burgut Burrel, as nga policia, as nga SHKB-ja. Në këto kushte rregjimi i të dënuarit vazhdon në kushte normale. Për ne ky informacion nuk është i vërtetë për sa kohë nuk kemi asnjë njoftim”, deklaron Drejtoria e Përgjithshme e Burgjeve.
Procedura standarde e marrjes së masave për të dënuarin ka të bëjë me verifikimin e saktësisë së informacionit nga autoritetet dhe më pas mbledhjen e grupit të punës për vlerësimin e rrezikut dhe marrjes së masave. SHKB-ja, Shërbimi Informativ dhe Drejtoria e Burgjeve mblidhen për të transferuar apo jo Mulosmanin, vetëm në rast se informacioni qëndron.
Nuk ka informacione të sakta se kush ka dashur ta ekzekutojë Mulosmanin apo nëse do të transferohet nga burgu i sigurisë së lartë të Burrelit. Mulosmani është dënuar me burgim të përjetshëm për vrasjen e Azem Hajdarit.” / SHUPLAKA
