Reagon sërish Fatmir Xhafaj dhe sfidon opozitën

Fatmir Xhafaj ka reaguar përmes një postimi në ‘Twitter’ pas dorëheqjes së tij dhe reagimeve të shumta që pasuan.

Përmes një reagimi në ‘Tëitter’ Xhafaj thotë se ka marrë qindra mesazhe vlerësuese për punën e tij dhe miq e partner me të cilët ka punuar.

“Këto orë kam marrë me qindra sms vlerësimi e respekti për punën e bërë, nga qytetarë të vendit tim, por dhe miq e partnerë me të cilët punova.Një pjesë e madhe nga socialistë, që kam bërë rrugë të gjatë në jetën time. Shumica dërrmuese e mesazheve nga njerëz të panjohur prej meje”, shkruan Xhafaj.

Ai thotë se opozita me komentet për dorëheqjen e tij konfirmon edhe një herë degradimin e saj politik dhe ka thënë se i sfidon ata por këdo që të provojë akuzat e bërë ndaj tij në kohen kur ishte ministër. Xhafaj ka thënë se dorëheqjen e ka dhënë me vullnetin e tij.

“Ju jam sinqerisht mirënjohës për këto mesazhe inkurajuese. I siguroj të gjithë se dorëheqja ime është tërësisht me vullnetin tim të lirë dhe e bazuar në principe dhe vlera njerëzore e institucionale. Ajo është tërësisht respekt për veten, e për këto standarde të shenjta për mua”, shkruan ai.

Ish-ministri i Brendshëm thotë se i përbuz shpifjet neveritëse të kujtdo që s’mund të kuptojë dot se ka dhe njerëz në politikë që mund të jenë të lirë e vetvetja, në çfarë mendojnë e çfarë bëjnë.

“Përbuz shpifjet e komentet neveritëse të kujtdo që s’mund të kuptojë dot se ka dhe njerëz në politikë që mund të jenë të lirë e vetvetja, në çfarë mendojnë e çfarë bëjnë. Ligësinë e pafytyrësinë e tyre thjesht e neveris me heshtjen time.Koha mbetet gjykatësi më i mirë për cilindo”, thekson ish-ministri.

(B.H/Faxweb)