Reagon Sonila Meço: 4 programe për shpërthimin e Manjanit, asnjë investigim

Gazetarja e njohur Sonila Meço për shkarkimin e Ylli Manjanit nga detyra ka komentuar shumë në rrjetet sociale rreth kësaj çështjeje. Në një postim të fundit në Facebook ajo ka sulmuar mediat dhe analistët.

Gazetarja Meço shkruan se u transmetuan 4 programe me shkarkimin e Manjani, dhe asnjëri prej tyre nuk kishte investigim mbi akuzat e forta që bëri ish-ministri i Drejtësisë.

Sipas saj, në vend që të mësojmë si formëzohet një opinion, po na projektohet në kokë modeli më asgjësues i gjykimit: po shohim ç’do të thotë të udhëheqësh me Twitter, Facebook e analistë.

Reagimi: 
“-1 ditë nga shpërthimi i Manjanit.
2 ditë nga kohëzgjatja e çudisë.
4 programe mbrëmjeje me këtë temë, pa asnjë investigim mbi akuzat e ministrit të drejtësisë.
Mijëra statuse e batuta në rrjete sociale.
Miliona aludime që zbojnë njëra-tjetrën në përpjekjen për të rivendosur prioritetet: koalicioni, Balili, kanabisi, konçensionet, dashnoret, reforma në drejtësi, arbitrazhet ndërkombëtare… edhe një herë kanabisi, reforma, dashnoret, koalicioni, Balili….edhe nje herë konçesionet, dashnoret….lëre më mirë. Lëre!
Këto janë pasojat e ortekut të lajmeve jo lajme, propagandës. Të opozitës që përdor vetëm lidhjen e shkurtër facebook-foltore.
Të gazetarëve që nuk i kapin argumentet një nga një, t’u hyjnë me kokë a edhe stomak: konçesione të paligjshme, lëvrime fondesh pa prokurime, mbështetje qeveritare krimit, prokurorë e gjykata nën urdhra celularësh etj, etj…
Tonat që prekemi shpejt e logjikojmë ngadalë.
E kur mungon një instancë e respektuar që të japë një shembull, do gjendet shpjegimi me 140 gërma në Twitter, duke iu përgjigjur çdo komenti në rrjete sociale, duke bërë zapping nga studio në studio televizive.
Në vend që të mësojmë si formëzohet një opinion, po na projektohet në kokë modeli më asgjësues i gjykimit: po shohim ç’do të thotë të udhëheqësh me Twitter, Facebook e analistë.
Do vullnet kjo punë, tundimi i sipërfaqësisë është shpesh i papërballueshëm. Dhe do na mbysë të gjithëve në cektinë…”, shkruan Meço në Facebook. (J.V/Shuplaka)