Reagon kryebashkiaku i Tepelenës Tërmet Peçi pas kërkesës së kryeprokurorit Adriatik Llalla për heqjen e mandatit.
”Unë e di mirë se kujt i intereson kjo luftë me mua!”, reagon Peçi, i cili shton se e gjitha ka të bëjë me një gjobë për makinën në doganë.
REAGIMI I PLOTË:
”Të dashur bashkëqytetare, mora nga mediat lajmin se qenkam kriminel:-) Prokuroria e Përgjithshme kërkon mandatin tim sipas mediave për një dënim të padeklaruar. E vërteta është se fillimisht nuk e deklarova një gjobë për makinën në doganë. Këtë e korrigjova dhe e depozitova në KQZ qysh në qershor 2016 përmes një deklarate sqaruese. Ky është krimi që kam bërë dhe kjo nuk është një vepër penale siç e parashikon ligji përkatës!
Unë e di mirë se kujt i intereson kjo luftë me mua për të më njollosur përmes mashave pseudo-institucionale. Janë po ata që kanë vite që më janë qepur pas dhe nuk kanë lënë gjë pa thëne për mua! Po meqë i ka zënë nata jashtë nuk po merrem me ta sot. Por në 18 qershor do merremi shumë seriozisht unë edhe ju që këta llumra që janë mbledhur në një çadër nga tmerri i krimeve që kanë bërë dhe i drejtësisë që po u vjen pas koke!
Forca të punojmë fort për Partinë Socialiste dhe Edi Ramën në emër të Tepelenës që pas largimit të llumit që e mbyti me vite po rilind në çdo cep të saj!
Përqafime Tërmeti”
Kryeprokurori Adriatik Llalla deklaroi nga Gjirokastra se i ka bërë kërkesë KQZ-së për heqjen e mandatit të kreut të bashkisë së Tepelenës dhe kreut të bashkisë së Poliçanit, Adriatik Zotkaj.
“I janë dërguar KQZ vendimet e konstatimit për ndërprerjen e mandatit për kryebashkiakët e Tepelenës dhe Poliçanit, pasi rezulton se nuk kanë deklaruar dënimet, të cilët përfshihen në sferën e ndalimit për ushtrimin e funksionit, në kuader të ligjit për dekriminalizimin”, tha i prerë Llalla. (V.G/SHUPLAKA)
