Për të gjithë të apasionuarit ndaj futbollit ka lajme të mira. Tashmë kanë startuar pothuajse të gjitha ligat më të mira të futbollit. Kështu në Spanjë, në javën e parë të La Ligas, Reali dhe Barcelona kanë arritur të korrin fitore bindëse.
Barcelona mposhti në shtëpi me rezultatin 2-0 skuadrën e Real Betisit.
Katalanasit kaluan në avantazh në minutën e 36 falë autogolit të shënuar nga Toska, ndërkohë që tre minuta më vonë ishte Serxhi Roberto që dyfishoi shifrat. Ky rezultat nuk ndryshoi më deri në fund të takimit, por duhet përmendur që Lionel Mesi goditi tre herë shtyllën, duke qenë i pafat për të shënuar emrin mes golashënuesve të këtij takimi.
Kjo fitore i jep Barcelonës njëfarë qetësie psikologjike pas periudhës së vështirë që po kalon në kohët e fundit e cila filloi me shitjen e brazilianit Nejmar dhe më pas mes humbjen e Superkupës së Spanjës përballë Realit të Madridit.
Nga ana tjetër as Reali i Madridit nuk zhgënjeu teksa ka mposhtur në transfertë me rezultatin 0-3 Deportivo La Korunjën.
Kampionët e Spanjës kaluan në avantazh në minutën e 20 me anë të Garet Bejl ndërkohë që 7 minuta më vonë Kasemiro dyfishoi shifrat. Në minutën e 62-të Toni Kros shënoi edhe golin e tretë për të vulosur fitoren e madrilenëve. Në minutën e 2-të të shtesës Ramos u ndëshkua me karton të kuq pas dy të verdhëve.
(E.K/SHUPLAKA)
Discussion about this post