Bashkëkryetari i Komisionit për Reformën Zgjedhore, Bledi Çuçi tha se Reforma Zgjedhore është dërguar në Parlament dhe do të futet në diskutim sapo të plotësohen vendet vakante.
Sipas tij, ky është një qëndrim të cilin mazhoranca e ka shumë të qartë duke argumentuar se këto janë disa detyrime ndaj Bashkimit Europian, Këshillit të Europës dhe OSBE-së, deklaroi Çuçi në emisionin “Tempora” në Ora News.
“Reforma zgjedhore është gati, është në Parlament. E kemi dorëzuar dhe shkruar me dy ekspertë të shkëlqyer shqiptarë që mund të jenë dy më të mirët që janë Ilir Rusmajli dhe Viktor Gumi, të dy ish-ministra dhe ish-deputetë të PD-së të zgjedhur me konsensus me zt. Bylykbashi. Është në Parlament.
Të shohim si do shkojë gjithë pjesa e zëvendësimeve nga dorëheqja e disa deputetëve dhe me t’u krijuar kuorumi i nevojshëm do ta fusim në diskutim këtë dokument kaq të rëndësishëm, me ata që do të zëvendësojnë vendet e mbetura bosh. Ky është një qëndrim që ne e kemi shumë të qartë sepse kemi disa detyrime ndaj BE-së, Këshillit të Evropës dhe OSBE-së”.
