Kreu i Partisë Zgjidhja Koço Kokëdhima ka qenë sot i ftuar në studion e lajmeve në Fax News ku ka komentuar zhvillimet e fundit të reformës zgjedhore, që sipas tij po shndërrohën në farsë për shkak se PD dhe PS i frikësohen vullnetit real të qytetarëve.
Kokëdhima tha se qëndrimin e forcës së tij politike ja ka paraqitur dhe ambasadorit të OSBE-së në vendin tonë, gjatë një takimi pune ditën e sotme. Kreu i Zgjidhjes shtoi më tej se sa kohë që depolitizimin e administratës së zgjedhjeve e marrin përsipër ta bëjnë partitë, atëherë besueshmëria në të është e ulët.
‘’Ne i kemi kërkuar ambasadorit të OSBE-së që Reforma Zgjedhore të mos jetë një farsë, ashtu siç po e çojnë procesin dy partitë e mëdha.
PD dhe PS janë kthyer në dy sulltanate që vjedhin dhe shkatërrojnë shqiptarët. Shqipëria është një vend i lumtur vetëm për këta horrat që vjedhin dhe plaçkisin, pasi për shqiptarët jo.
Partia Zgjidhja mbetet e vendosur që objektivin e saj strategjik për pastrimin e zgjedhjeve do ta ndjekim deri në fund, nuk do lejojmë që të mashtrohen as qytetarët shqiptarë dhe as partnerët ndërkombëtarë. Ne nuk do të lejojmë që të na shesin farsën për reformë.
PS dhe PS nuk kanë platforma të ndryshme për çështjen e zgjedhjeve. Ata kanë për qëllim që të mbrojnë vetëm veten dhe ata që kanë pranë vetes e që kanë lidhje me krimin.
PD dhe PS duan të bëjnë gjoja një depolitizim, ata thonë që do jenë të depolitizuara komisionet e votimit dhe të numërimit, pasi do i emërojë KQZ, ndërsa vetë KQZ-ja do vijojë të zgjidhet me propozimin e këtyre partive.
Nëse duam që të ketë një depolitizim të administratës së zgjedhjeve kjo duhet të nisë me patjetër nga vetë KQZ, që duhet të jetë apolitik”, u shpreh Kokëdhima.
(E.K/FAXWEB.AL)
